Azərbaycan Ümumdünya Şəhərsalma Forumunun paytaxtına çevrilməklə, qlobal miqyasda artan nüfüzunu bir daha təsdiq etdi.

Bunu "Report"a açıqlamasında Milli Məclisin deputatı Zaur Şükürov deyib.

O bildirib ki, mayın 17-22-si tarixlərini əhatə edən həftə Azərbaycan üçün tarixi bir dövrə çevrildi: "Forumda ilkin olaraq 182 ölkədən 45 mindən artıq iştirakçının qeydiyyatdan keçməsi barədə məlumat yer almış, lakin tədbirin sonuna yaxın dəqiqləşmiş məlumatda 57 000-dən çox iştirakçının tədbirə qatıldığı məlum oldu. Bu rəqəmlərlə Bakı Forumu Ümumdünya Şəhərsalma Forumu tarixinin ən kütləvi sessiyası olmaqla yanaşı, 2024-cü ilin noyabrında Azərbaycanda keçirilmiş COP29-dan sonra ölkəmizdə baş tutmuş ikinci ən böyük beynəlxalq tədbir oldu. Məhz 2026-cı ilin "Şəhərsalma və Memarlıq İli" elan olunması bu sahəyə verilən xüsusi önəmin göstəricisi kimi qiymətləndirilməlidir. Həmçinin, işğaldan azad olunmuş şəhərlərimizdə Ağdamda, Zəngilanda və Xankəndidə milli şəhərsalma forumlarının keçirilməsi, post-münaqişə dövründə dayanıqlı yaşayış məkanlarının formalaşdırılması yolunda mühüm addımlardır".

Depuat Forum çərçivəsində Azərbaycanın bir sıra təşəbbüsünə diqqət çəkib: "Belə ki, 19 may tarixdə QHT-lərə Dövlət Dəstəyi Agentliyinin təşkilatçılığı və 116 ölkənin QHT-lərini birləşdirən "Qlobal Cənub QHT Platforması" ilə tərəfdaşlıqla Ümumdünya Şəhərsalma Forumunun tarixində ilk dəfə olaraq "WUF13 QHT Forumu" keçirildi və BMT rəsmiləri bunu tarixi hadisə adlandırdı. 3,5 hektar ərazidə qurulmuş "Urban Expo" sərgisi 66 ölkədən 217 təşkilatı bir araya gətirərək, Bakını qlobal şəhərsalma innovasiyaları və startaplarının qovuşağına çevirdi. WUF13 çərçivəsində beynəlxalq media nümayəndələri üçün Şamaxıya media turu da təşkil olundu - bu, xarici jurnalistlərə Azərbaycanın regional şəhərsalma siyasəti ilə daha dərindən tanış olmaq imkanı verdi".

Deputat bildirib ki, WUF13-ün Azərbaycana verdiyi strateji dividentləri bir neçə istiqamətdə dəyərləndirmək mümkündür: "Öncə, bu Forumun Bakıda keçirilməsi Azərbaycanın dünya miqyasında artan nüfuzunun göstəricisi olmaqla yanaşı, ölkəmizin yalnız böyük tədbirlərə ev sahibliyi edən dövlət deyil, qlobal problemlərə innovativ həllər təklif edən strateji və etibarlı tərəfdaşa çevrildiyinin sübutu hesab edilə bilər. İkincisi "Bakı Fəaliyyətə Çağırışı" sənədinin qəbul olunması qeyd edilməlidir. Forumun yekun nəticələri və "Bakı Fəaliyyətə Çağırışı" sənədinin 2026-cı ilin iyulunda Nyu-Yorkda keçiriləcək BMT Baş Assambleyasının Yeni Şəhər Gündəliyinə dair yüksəksəviyyəli aralıq qiymətləndirmə iclasına mühüm töhfə verəcəyi gözlənilir. Üçüncüsü, postmünaqişə bərpa modelinin qlobal miqyasda təqdir edilməsidir. Belə ki, Azərbaycanın post-münaqişə bərpası sahəsindəki təşəbbüsü WUF13-ün "Bakı Fəaliyyətə Çağırışı" adlı yekun sənədində də dəstəkləndi. Və nəhayət, bu Forum diplomatik əlaqələrin genişlənməsi üçün əhəmiyyətli bir imkana çevrildi. Forum boyunca dünya liderləri və tanınmış siyasətçilərlə aparılan dialoqlar Azərbaycanın qlobal şəhərsalma gündəliyinin formalaşmasında aktiv rolunu bir daha təsdiqlədi".

"Ümumiyyətlə, WUF13-ün uğurları sırasında ən azı üç məqamı xüsusilə vurğulaya bilərik - Azərbaycan rekord iştirakçı sayı ilə dünya şəhərsalma strategiyasının mərkəzinə çevrildi; Qarabağ və Şərqi Zəngəzurun bərpa modeli beynəlxalq sənədlərə daxil edilərək qlobal nümunə kimi təqdir edildi və ilk dəfə olaraq Ümumdünya Şəhərsalma Forumu tarixində WUF13 QHT Forumu kimi yeni bir format təsis edildi.

Bütün bunlar isə Prezident İlham Əliyevin liderliyi və uzaqgörən siyasəti nəticəsində Azərbaycanın yalnız beynəlxalq tədbirlərin keçirildiyi coğrafi məkana deyil, qlobal gündəliyin formalaşdırıldığı strateji platformaya çevrildiyinin danılmaz sübutudur", - Z.Şükürov əlavə edib.​​​​​​​​​

Oxşar xəbərlər

İlham Əliyev Ağdamda 2-ci yaşayış kompleksinin açılışında iştirak edib

Leyla Əliyeva və Arzu Əliyeva Şəkidə tarixi-memarlıq abidələrinin bərpadan sonra açılışında iştirak ediblər

Bakıda Ümumdünya Şəhərsalma Forumunun 13-cü Sessiyasının açılış mərasimi keçirilir Prezident İlham Əliyev çıxış edib

İlham Əliyevin XIII Qlobal Bakı Forumunun açılış mərasimindəki çıxışının TAM MƏTNİ

Vətən müharibəsində Qələbənin beşinci ildönümünə həsr olunmuş Hərbi parad keçirilib