Səkkiz ay əvvəl açılışı olan Gəncə Memorial Kompleksi artıq üç aya yaxındır qaranlığa qərq olub.

Vətən müharibəsinin mülki qurbanlarının xatirəsinə inşa edilən kompleksdə işıqlandırma sistemi işləmir.

Sakinlər mövcud vəziyyətlə bağlı narazılıqlarını ifadə ediblər.

Onlar Baku TV-yə bildiriblər ki, ərazidə işıqlandırmanın olmaması həm istirahət, həm də təhlükəsizlik baxımından çətinliklər yaradır.

"Uşaqları oynamaq üçün gətiririk, amma hava qaralmamış evə qayıtmalı oluruq", - deyə sakinlərdən biri bildirib.

Başqa bir sakin isə qeyd edib:

"Velosiped sürənlər çoxdur, qaranlıqda onları görmək olmur, adamın üstünə çıxırlar".

Məsələ ilə bağlı Gəncə-Daşkəsən Regional Mədəniyyət İdarəsindən bildirilib ki, Gəncə Memorial Kompleksinin park ərazisinin işıqlandırılması ilə bağlı yaranmış məsələ kompleksin tikintisini həyata keçirən podratçı şirkətlə aparılan təhvil-təslim prosedurlarının yekunlaşma mərhələsi ilə əlaqədar olub.

Qeyd olunub ki, sözügedən proses yaxın günlərdə tam başa çatdırılıb. Həmin dövr ərzində kommunal xidmətlərlə bağlı öhdəliklər podratçı şirkətin məsuliyyətinə aiddir.

Elektrik enerjisi təchizatında yaranmış fasilənin də məhz texniki prosedur xarakterli məsələlərlə bağlı olduğu bildirilib.

Hazırda kompleksin kommunal xərclərinin aidiyyəti qaydada təmin olunması istiqamətində işlərin aparıldığı və yaxın günlərdə park ərazisinin işıqlandırma sisteminin tam şəkildə bərpa ediləcəyinin nəzərdə tutulduğu vurğulanıb.

Oxşar xəbərlər

Palçıq Vulkanları Turizm Kompleksi – Azərbaycanın təbiət möcüzələrinə açılan yeni qapı

İlham Əliyev Ağdamda 2-ci yaşayış kompleksinin açılışında iştirak edib

Bakıda Zəfər muzeyinin açılışı olub

Prezident Gəncə Memorial Kompleksinin açılışında iştirak edib

Vətən müharibəsində Qələbənin beşinci ildönümünə həsr olunmuş Hərbi parad keçirilib