Türk Dövlətləri Təşkilatına (TDT) daxil olan ölkələrin rəqabət orqanları bazar gücündən sui-istifadə edən iri platformalara qarşı qarşılıqlı əməkdaşlığı möhkəmləndirməlidir.

"Report"un Şuşaya ezam olunmuş əməkdaşı xəbər verir ki, bunu Türkiyə Rəqabət Qurumunun sədri Birol Küle "Türk Dövlətləri Təşkilatı ölkələrinin rəqabət qurumları rəhbərlərinin 3-cü iclası və Rəqabət Forumu" çərçivəsində təşkil edilən "TDT-nin hərəkətverici qüvvələrindən biri kimi rəqabət siyasətinin formalaşdırılması: regional əməkdaşlıq" mövzusunda panel müzakirələrində bildirib.

Onun sözlərinə görə, təşkilatın qurulmasında başlıca hədəflərdən biri Türk dövlətləri arasında əməkdaşlığın daha da dərinləşdirilməsi olub və rəqabət orqanları da bu sahədə aktiv rolu üzərinə götürməlidir:

"Türk Dövlətləri Təşkilatının coğrafiyasını vahid iqtisadi məkan olaraq dəyərləndirməli və bazar gücündən, dominant mövqedən sui-istifadəyə yol verən iri platformalara qarşı rəqabət və beynəlxalq hüquq çərçivəsində ortaq mübarizə aparmalıyıq. Rəqabət qurumları arasındakı əməkdaşlıq təkcə illik görüşlərlə məhdudlaşdırılmamalıdır. Ekspertlər, menecerlər və mütəxəssislər il ərzində daimi əlaqədə olmalı, birgə layihələr reallaşdırmalı və rəqabətə zidd praktikalara qarşı mübarizə imkanlarını genişləndirməlidirlər".

Türkiyə Rəqabət Qurumunun rəhbəri rəqəmsal platformalar, enerji, kənd təsərrüfatı və ərzaq sahələri üzrə daimi fəaliyyət göstərən işçi qruplarının və alt komissiyaların təsis edilməsini təklif edib.

"Bu komissiyalar öz fəaliyyətini fasiləsiz şəkildə davam etdirməli və təşkilatın yaradıldığı ilk gündəki ruhunu qoruyub saxlamalıdır. Bazar gücündən sui-istifadə edən təsərrüfat subyektlərinin qarşısı alınmadığı təqdirdə, milli sənaye və ticarətin inkişafı ləngiyə, innovasiya və məhsuldarlıq göstəriciləri isə geriləyə bilər".

Oxşar xəbərlər

Prezident Davosda "Avrasiyanın iqtisadi özünəməxsusluğunun müəyyənləşdirilməsi" mövzusunda panel iclasında iştirak edib

İlham Əliyev Türküstanda TDT-nin qeyri-rəsmi Zirvə görüşündə iştirak edib

Leyla Əliyeva "Mənzərəyə açılan ev" mövzusunda qrup sərgisində iştirak edib

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib

Bişkekdə TDT ölkələri hökumət başçılarının iclası olub, Birgə Bəyanat qəbul edilib