Müdafiə Nazirliyinin təşəbbüsü ilə Tibb İdarəsində hərbi, hüquq-mühafizə və digər müvafiq dövlət qurumlarının nümayəndələrinin iştirakı ilə müşavirə keçirilib.

Bu barədə "Far.Az"a nazirlikdən məlumat verilib.

Bildirilib ki, tədbirdə Müdafiə Nazirliyinin Mərkəzi Hərbi-Həkim Komissiyası, Daxili İşlər Nazirliyinin Daxili Qoşunları, Ədliyyə Nazirliyi, Fövqəladə Hallar Nazirliyi, Dövlət Mühafizə Xidməti, Dövlət Sərhəd Xidməti, Dövlət Gömrük Komitəsi, Səfərbərlik və Hərbi Xidmətə Çağırış üzrə Dövlət Xidməti, Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin həkim mütəxəssisləri iştirak ediblər.

Müdafiə Nazirliyinin Tibb İdarəsinin rəisi tibb xidməti polkovniki Anar İsmayılov qonaqları salamlayaraq vətəndaşların və hərbi qulluqçuların tibbi şəhadətləndirilməsi prosesinin müasir dövrün tələblərinə, tibb elminin nailiyyətlərinə və qabaqcıl beynəlxalq təcrübəyə uyğun təkmilləşdirilməsinin vacibliyini qeyd edib.

Aparılan müzakirələr zamanı "Hərbi-həkim ekspertizası haqqında Əsasnamə"yə dəyişikliklərin edilməsi ilə bağlı qurumların rəyləri dinlənilib və vahid yanaşmaya əsaslanan təkliflər paketinin hazırlanması istiqamətində fikir və mülahizələr səsləndirilib.

Bununla yanaşı, dövlət qurumlarının tibbi ekspert komissiyalarının nümayəndələri tərəfindən irəli sürülən təkliflər ümumiləşdirilib, normativ tənzimləmələrin daha səmərəli, şəffaf və müasir tələblərə uyğun təkmilləşdirilməsi istiqamətində əsas yanaşmalar müəyyən edilib.

Qeyd edək ki, müşavirə hərbi tibbi ekspertiza sahəsində yeni baxışların formalaşdırılması, qabaqcıl təcrübələrin nəzərdən keçirilməsi və vahid ekspert yanaşmasının müəyyən edilməsi baxımından mühüm əhəmiyyətə malikdir.

Oxşar xəbərlər

Yeni Klinikada Yeni Robotik Reabilitasiya və Sümük İliyi Transplantasiyası mərkəzlərinin açılışı olub

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Sima Useynova – Azərbaycan aerokosmik elminin sönməyən işığı

Leyla Əliyevanın təşəbbüsü ilə uşaq evlərinin komandaları arasında növbəti minifutbol turniri təşkil olunub

Nazirlikdən "Baku Electronics" MMC-yə məxsus mağazada YOXLAMA