Moldovanın paytaxtı Kişineuda Azərbaycanın görkəmli müğənnisi Müslüm Maqomayevə həsr olunmuş "Sevgi və dəniz" adlı gecə keçirilib.

"Far.Az"un Şərqi Avropa bürosunun məlumatına görə, 1000-dən çox qonağın iştirak etdiyi tədbir Maria Bieşu adına Kişineu Milli Opera və Balet Teatrında baş tutub.

Moldova Azərbaycanlıları Konqresinin təşkilatçılığı ilə keçirilən tədbirdə bu ölkənin rəsmi şəxsləri, parlamentin deputatları, Kişineudakı diplomatik korpusun təmsilçiləri, yerli mədəniyyət xadimləri, ictimaiyyət və Azərbaycan diasporunun nümayəndələri, həmçinin Azərbaycan Mədəniyyət Nazirliyi və Diasporla İş üzrə Dövlət Komitəsinin əməkdaşları iştirak ediblər.

Gecədə çıxış edən Moldova Azərbaycanlıları Konqresinin sədri Elçin Bayramov bildirib ki, Müslüm Maqomayev şəxsiyyəti Azərbaycan xalqı və iki dövlət arasında mədəni əlaqələrdə xüsusi əhəmiyyətə malikdir:

"Müslüm Maqomayevin adı çoxdan yüksək mədəniyyətin, qüsursuz bədii zövqün və sənətə həqiqi xidmətin simvoluna çevrilib. Onun unikal səsi, səhnə kübarlığı və müxtəlif nəsillərdən olan insanların qəlblərinə eyni dərəcədə dərindən toxunmaq qabiliyyəti onu təkcə Azərbaycanın deyil, dünya musiqi mədəniyyətinin sərvətinə çevirib. Onun yaradıcılığı insanları birləşdirməyə hələ də davam edir, dövrlər, ölkələr və mədəniyyətlər arasında körpü olaraq qalır".

Daha sonra Moldovanın tanınmış sənətçiləri – M.Bieşu adına Milli Opera və Balet Teatrının solisti, bu ölkəni dəfələrlə nüfuzlu səhnələrdə, o cümlədən məşhur "La Scala" teatrında təmsil etmiş Aleksey Botnarçuk (bas) və Azərbaycan əsilli Gülnarə Raylyanu (soprano) M.Maqomayevin repertuarından seçmə əsərləri səsləndiriblər.

Oxşar xəbərlər

SOCAR-ın təşkilatçılığı, "Neftçi" və "Galatasaray" klublarının tərəfdaşlığı ilə şəhid və qazi övladları üçün "Futbol günü" adlı tədbir keçirilib

Din xadimləri Qarabağ və Şərqi Zəngəzurdakı tarixi-dini abidələri ziyarət ediblər

Şuşa Dövlət Musiqili Dram Teatrında inkluziv bir qizin mono tamaşası

Vətən müharibəsində Qələbənin beşinci ildönümünə həsr olunmuş Hərbi parad keçirilib

Bakıda Azərbaycan səhiyyəsi üçün önəmli tədbir keçirilib