Azərbaycan və Pakistan ticari-iqtisadi əlaqələrin daha da möhkəmləndirilməsi üçün əhəmiyyətli potensiala malikdir.

"Report" xəbər verir ki, bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev "Pakistan TV"yə müsahibəsində bildirib.

Onun sözlərinə görə, bu potensialın reallaşdırılması üçün işgüzar dairələr arasında təmasları aktivləşdirmək, investisiya imkanları barədə məlumatlılığı artırmaq və hər iki ölkənin özəl sektorunun əməkdaşlığını genişləndirmək lazımdır.

H.Hacıyev Azərbaycan və Pakistan arasındakı münasibətləri qarşılıqlı etimada və dəyişməz dəstəyə əsaslanan strateji tərəfdaşlıq kimi xarakterizə edib.

O həmçinin hər iki ölkə rəhbərliyi arasındakı qarşılıqlı anlaşmanı yüksək qiymətləndirərək ikitərəfli əməkdaşlığın müxtəlif sahələrdə genişlənməyə davam etdiyini bildirib.

"Siyasi və geostrateji səviyyələrdə Pakistan və Azərbaycan arasındakı münasibətlər mükəmməldir", - Azərbaycan Prezidentinin köməkçisi vurğulayıb.

H.Hacıyev birbaşa aviareyslərin sayının artması sayəsində iki ölkə vətəndaşları arasında turizm səfərlərinin çoxalmasını müsbət qiymətləndirib. O həmçinin mədəni əlaqələrin və xalqlar arasında təmasların daha da inkişaf etdirilməsinin zəruriliyini vurğulayıb.

Media sahəsində əməkdaşlıqdan danışan H.Hacıyev pakistanlı jurnalistlərin Şuşa Qlobal Media Forumunda yarandığı gündən etibarən fəal iştirakını qeyd edib.

O xatırladıb ki, forum Şuşanın intellektual və mədəni dialoq mərkəzi, eləcə də dezinformasiya, süni intellekt və strateji kommunikasiyalar da daxil olmaqla media sahəsindəki müasir çağırışların müzakirəsi üçün beynəlxalq platforma kimi tarixi rolunu bərpa etmək məqsədilə Azərbaycan tərəfindən irəli sürülüb.

H.Hacıyev həmçinin Pakistan və Azərbaycan mediası arasında əməkdaşlığın genişlənməsindən məmnunluğunu ifadə edərək qeyd edib ki, mübadilələrin fəallaşması iki qardaş xalq arasında qarşılıqlı anlaşma və dostluğun daha da möhkəmlənməsinə töhfə verəcək.

Bundan əlavə, Azərbaycan Prezidentinin köməkçisi Yaxın Şərqdəki son gərginlik zamanı Pakistanın vasitəçilik rolunu yüksək qiymətləndirib.

Onun sözlərinə görə, İslamabad gərginliyin azaldılmasına və dialoqun inkişafına yönəlmiş səyləri dəstəkləyərək strateji müdriklik və məsuliyyətli liderlik nümayiş etdirib. O qeyd edib ki, Pakistan rəhbərliyi kritik bir məqamda bu regionda sülhün təşviqi üçün əhəmiyyətli səylər göstərərək gərginliyin azalması üçün şəraitin yaradılmasına töhfə verib.

"Pakistan rəhbərliyi öz qiymətli vaxtını və səylərini sülh işinə həsr edir", - H.Hacıyev əlavə edib.

Onun sözlərinə görə, Pakistanın konstruktiv rolu İslamabadın qlobal proseslərdə artan geostrateji əhəmiyyətini vurğulayıb və ölkənin regional və beynəlxalq sabitliyə sadiqliyini əks etdirir.

Oxşar xəbərlər

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3