ABŞ Prezidenti Donald Tramp Pentaqon rəhbəri Pit Heqsetin fəaliyyətindən tamamilə razı olduğunu bildirib.

"Report"un məlumatına görə, ABŞ lideri bununla bağlı "Truth Social" sosial şəbəkəsində paylaşım edib.

Onun sözlərinə görə, Pit Heqset hərbçilər arasında yüksək nüfuza malikdir və müdafiə naziri kimi əhəmiyyətli nəticələr əldə edib.

"Saxta xəbərlər, həmişəki kimi, yalan və tamamilə əsassız şayiələr yayılır. Mən Pit Heqsetin gördüyü işdən son dərəcə məmnunam. Hər şey, o cümlədən Venesuelaya hücumumuz da qeyri-adi olub, burada nəticələr bir gündən az müddətdə əldə edilib və bu, dünyanın ən qorxulu cinayətkarlarından biri olan Nikolas Maduronu ədalət mühakiməsinə cəlb etməyə imkan verib", - Tramp yazıb.

O, həmçinin qeyd edib ki, Vaşinqtonun hərəkətləri İranı nüvə silahı hazırlamaq qabiliyyətindən məhrum edib: "Eyni şey İrana da aiddir, çünki ölkə nüvə silahı əldə etməsinin qarşısını almaq üçün xeyli zəiflədilib. Orada da işlər çox yaxşı gedir!"

Bundan əlavə, ABŞ Prezidenti Heqset dövründə DEI (müxtəliflik, bərabərlik və inklüzivlik) proqramlarının ləğv edildiyini və hərbi xidmətə qəbulun rekord səviyyələrə çatdığını bildirib.

"Washington Post"un xəbərinə şərh verən Tramp onun məlumatını tamamilə yalan adlandırıb. "Bu şayiə, onların materialının tamamilə yalan olduğunu bildirməyimizə baxmayaraq, biznesin ən pis media orqanlarından olan The Washington ComPost tərəfindən yayılıb. Əslində, mən onların yalan "reportajlar"ının həqiqətən dövlətə xəyanət olduğunu hesab edirəm!", - Tramp bildirib.

Daha əvvəl "The Washington Post" qəzeti Trampın Heqsethin hərəkətlərindən narazı olduğunu bildirib, çünki o, dövlət başçısını ABŞ-nin silah ehtiyatlarının vəziyyəti barədə yanlış məlumatlandırıb. Nəşrin məlumatına görə, bu, Prezidentin İrana yeni genişmiqyaslı hücumlardan imtina qərarına təsir edib. Ağ Ev və Pentaqon bu məlumatı təkzib edərək, məlumatı yalan adlandırıblar.

Oxşar xəbərlər

ABŞ Prezidenti Donald Trampın təşəbbüsü ilə yaradılan Sülh Şurası təsis edilib

Anar Ələkbərov "44" bədii filminin çəkilişlərinin başa çatması barədə paylaşım edib

Nailə Balayeva: Jurnalistin əsas silahı mənbədir

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3