Türk Dövlətləri Təşkilatının (TDT) daxili işlər nazirlərinin 3-cü toplantısı çərçivəsində Qazaxıstanda olan Türkiyənin daxili işlər naziri Mustafa Çiftçi qazaxıstanlı həmkarı Yercan Sadenovla görüşüb.

Bu barədə "Report" Türkiyə mətbuatına istinadən xəbər verir.

Görüşdə iki ölkənin hüquq-mühafizə orqanları arasında əməkdaşlığın daha da gücləndirilməsi müzakirə olunub. Xüsusən transmilli cinayətkarlıq və kibercinayətkarlıqla mübarizə, axtarış əməliyyatları, miqrasiya təhlükəsizliyi, kadr hazırlığı və müvafiq bölmələr arasında birbaşa əməkdaşlıq müzakirə olunub.

Görüşdən sonra nazirlər Qazaxıstan və Türkiyə arasında readmissiya sazişini (icazəsiz yaşayan şəxslərin geri qaytarılması haqqında saziş – red.) imzalayıblar.

Y.Sadenov bildirib ki, Qazaxıstan və Türkiyəni qardaşlıq münasibətləri və yüksək səviyyəli qarşılıqlı etimad bağlayır ki, bu da iki ölkənin qurumları arasında əməkdaşlıqda əks olunur.

O, qeyd edib ki, imzalanan müqavilə əməkdaşlığın gücləndirilməsi istiqamətində növbəti addımdır. Sadenov iki ölkə arasında təhlükəsizlik sahəsində əməkdaşlığın vacibliyinə diqqət çəkib.

Tərəflər nazirliklər arasında birbaşa ünsiyyəti yaxşılaşdırmaq, təcrübə mübadiləsini artırmaq və qarşıdakı dövrdə mövcud təhlükəsizlik məsələləri üzrə birgə işi gücləndirmək barədə razılığa gəliblər. Readmissiya sazişi iki ölkə arasında miqrasiya sahəsində əməkdaşlığın hüquqi əsasını gücləndirməyi və ərazilərində qalmaq üçün hüquqi əsası olmayan şəxslərin geri qaytarılması prosedurlarını müəyyən etməyi hədəfləyir.

Oxşar xəbərlər

Bakıda TDT Xəritəçəkmə Qurumları Rəhbərlərinin ikinci iclası keçirilib, bəyannamə qəbul edilib

İlham Əliyev Türküstanda TDT-nin qeyri-rəsmi Zirvə görüşündə iştirak edib

Bakıda Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin açılış mərasimi olub

Bişkekdə TDT ölkələri hökumət başçılarının iclası olub, Birgə Bəyanat qəbul edilib

İlham Əliyev TDT-yə üzv dövlətlərin hökumət başçılarının görüşünün iştirakçılarını qəbul edib