General-mayor İsgəndər Allahverdiyev dəfn edilib.

Bu barədə Far.Az-ə Dövlət Sərhəd Xidmətindən məlumat verilib.

Hərbi Memorial Məzarlıqda keçirilən mərasimdə mərhumun ailə üzvləri və yaxınları, Dövlət Sərhəd Xidmətinin, Müdafiə Nazirliyinin və Dövlət Təhlükəsizliyi Xidmətinin rəhbər heyəti, hərbi qulluqçular, veteran sərhədçilər, dövlət qurumlarının əməkdaşları, eləcə də ictimaiyyət nümayəndələri iştirak ediblər.

Mərasim zamanı general-mayorun Azərbaycan dövlətçiliyinə, təhlükəsizlik və sərhəd mühafizəsi orqanlarında xidmətlərinə toxunulub, onun əziz xatirəsi ehtiramla yad edilib.

Qeyd edək ki, İ.Allahverdiyev 1947-ci il fevralın 11-də Bakıda anadan olub. 1991-ci ildə yaradılan Dövlət Sərhədini Mühafizə Komitəsinin sədri təyin edilib, 1992-ci ildə general-mayor ali hərbi rütbəsinə layiq görülüb. Sonrakı dövrdə milli təhlükəsizlik nazirinin müavini, Sərhəd Qoşunları İdarəsinin rəisi və Sərhəd Qoşunlarının komandanı vəzifələrində xidmət edib. Azərbaycan sərhəd mühafizəsinin formalaşması və inkişafında mühüm xidmətləri olan general-mayor "Azərbaycan Bayrağı" ordeni ilə təltif edilib.

İ.Allahverdiyev sentyabrın 18-də vəfat edib.

***09:47

Müstəqil Azərbaycan Respublikasının Sərhəd Qoşunlarının ilk komandanı, sərhədçi generalı İsgəndər İmanverdi oğlu Allahverdiyev vəfat edib.

Far.Az-in məlumatına görə, İsgəndər Allahverdiyev 11 fevral 1947-ci ildə Bakı şəhərində anadan olub.

O, Azərbaycan dövlət sərhədinin mühafizəsi sisteminin formalaşmasında xüsusi xidmətləri olan hərbçilərdən biri kimi tanınırdı.

İsgəndər Allahverdiyev 1991–1992-ci illərdə Azərbaycan Respublikası Dövlət Sərhədini Mühafizə Komitəsinin sədri vəzifəsində çalışıb. 1992-ci ildə general-mayor ali hərbi rütbəsinə layiq görülüb.

Həmin ildən Azərbaycan Respublikası milli təhlükəsizlik nazirinin müavini və Azərbaycan Sərhəd Qoşunlarının ilk komandanı kimi fəaliyyət göstərib. O, 1992–1994-cü illərdə bu vəzifədə Azərbaycan sərhəd xidmətinin təşəkkülü prosesində iştirak edib.

General-mayor İsgəndər Allahverdiyevin vəfatı ilə bağlı yaxınlarına, doğmalarına və hərbçi yoldaşlarına dərin hüznlə başsağlığı veririk.

Allah rəhmət eləsin!

Oxşar xəbərlər

Prezident İlham Əliyev Əfv Sərəncamı imzalayıb

Dövlət rəsmiləri Hərbi Memorial Məzarlığı ziyarət ediblər

Prezident Gəncə Memorial Kompleksinin açılışında iştirak edib

Prezident İlham Əliyev Xocalıda hərbi qulluqçular üçün nəzərdə tutulan fərdi evlərdə yaradılmış şəraitlə tanış olub

ABŞ Prezidenti Donald Trampın təşəbbüsü ilə yaradılan Sülh Şurası təsis edilib