Bu gün Azərbaycanda Dövlət Bayrağı Günü qeyd olunur. Üçrəngli bayrağımız xalqımızın milli kimliyini, müstəqilliyini və dövlətçilik ənənələrini təcəssüm etdirən əsas rəmzlərdən biridir.

"Bizim bayrağımız bizim qürur mənbəyimizdir. Bayrağımız bizim canımızdır, ürəyimizdir. Bu gün Azərbaycanın hər bir yerində Azərbaycan bayrağı dalğalanır".

BAKU.WS xatırladır ki, Azərbaycan Xalq Cümhuriyyətinin hökuməti üçrəngli dövlət bayrağını 1918-ci il noyabrın 9-da qəbul edib. Bayraqdakı mavi, qırmızı və yaşıl rənglər müvafiq olaraq türkçülük, müasirlik və islamçılıq ideyalarını ifadə edir. Bu üç prinsipin ideoloji əsaslandırılması görkəmli mütəfəkkir Əli bəy Hüseynzadənin adı ilə bağlıdır.

1920-ci ildə Azərbaycan Xalq Cümhuriyyətinin süqutundan sonra üçrəngli bayraq dövlət rəmzi kimi istifadədən çıxarılsa da, xalqın yaddaşında yaşamağa davam edib.

1990-cı il noyabrın 17-də Heydər Əliyevin təşəbbüsü ilə Naxçıvan Muxtar Respublikası Ali Məclisinin sessiyasında üçrəngli bayraq muxtar respublikanın dövlət bayrağı kimi qəbul olunub. 1991-ci il fevralın 5-də isə Azərbaycan Ali Soveti bu bayrağı ölkənin dövlət bayrağı elan edib.

Prezident İlham Əliyevin 2009-cu il noyabrın 18-də imzaladığı sərəncamla noyabrın 9-u Dövlət Bayrağı Günü elan edilib. Sonradan Əmək Məcəlləsinə edilən dəyişikliklə bu tarix qeyri-iş günü kimi müəyyənləşdirilib.

Dövlət bayrağımızın tarixi Azərbaycanın müstəqillik mübarizəsi və ərazi bütövlüyünün bərpası ilə də sıx bağlıdır. 2020-ci ildə 44 günlük Vətən müharibəsi nəticəsində işğal altındakı ərazilərimizin azad edilməsi ilə üçrəngli bayrağımız Qarabağda yenidən dalğalanıb.

Cəbrayıl, Füzuli, Zəngilan, Qubadlı, Hadrut, Şuşa, Ağdam, Kəlbəcər, Laçın və Xankəndidə bayrağımızın ucaldılması Azərbaycanın tarixi Zəfərinin rəmzinə çevrilib.

Bu gün üçrəngli bayrağımız ölkəmizin bütün ərazisində dalğalanır. O, həm müstəqilliyimizin, həm də Vətən uğrunda canından keçən şəhidlərimizin müqəddəs xatirəsinin simvoludur.

Oxşar xəbərlər

Leyla Əliyevanın təşəbbüsü ilə uşaq evlərinin komandaları arasında növbəti minifutbol turniri təşkil olunub

ABŞ Prezidenti Donald Trampın təşəbbüsü ilə yaradılan Sülh Şurası təsis edilib

İlham Əliyevin iştirakı ilə İslam İnkişaf Bankı Qrupunun 2026-cı il üzrə İllik Toplantılarının açılış mərasimi keçirilib

1 Noyabr-Kənd Təsərrüfatı İşçiləri Günü münasibətilə jurnalistlər üçün maarifləndirici təlim keçirilib

Heydər Əliyev Fondunun dəstəyi ilə alınan musiqi alətlərinin təqdimatı olub