ABŞ-nin texnologiya nəhəngi "Nvidia" şirkətinin rəhbəri Censen Huanq şəxsi həyatı ilə bağlı etirafı ilə gündəmə gəlib. Milyarder həyat yoldaşına xəyanət etdiyini etiraf edərək ailəsindən üzr istəyib.

Far.Az xəbər verir ki, 63 yaşlı Huanq bu barədə şirkət əməkdaşlarına ünvanladığı məktubda yazıb. Onun etirafı Çin kəşfiyyatı ilə əlaqədə şübhəli bilinən biznesmen Elis Huanqla münasibətləri ətrafında yaranan müzakirələr fonunda yayılıb.

Milyarder həyat yoldaşı Lori və övladlarına yaşatdığı ağrılara görə peşman olduğunu bildirib. O, hərəkətlərinə bəraət qazandırmadığını, ailəsinin etimadını zamanla yenidən qazanmağa çalışacağını vurğulayıb.

Qeyd olunur ki, Elis Huanq Censen Huanqla eyni soyadı daşısa da, onun qohumu deyil. Sinqapurda fəaliyyət göstərən "Megaspeed" şirkətinin keçmiş rəhbərlərindən olan qadının Çin kəşfiyyatı ilə əməkdaşlıq etdiyi iddia olunur.

"New York Times"ın məlumatına görə, ABŞ kəşfiyyatının məxfi hesabatında Elis Huanqın Çin Dövlət Təhlükəsizliyi Nazirliyi tərəfindən məlumat toplamaq məqsədilə cəlb edildiyi qeyd olunub. Onun "Nvidia" rəhbəri ilə yaxınlığından və işgüzar əlaqələrindən istifadə edərək şirkətə aid məlumatları əldə edə biləcəyi ehtimal edilir. Bu iddiaların təfərrüatları isə hələlik açıqlanmayıb.

"Nvidia"nın direktorlar şurası məsələ ilə bağlı müstəqil araşdırmaya başlayıb. Şirkət rəhbərliyi hazırda milli təhlükəsizliyə və ya kommersiya sirlərinə təhlükə yarandığını düşünmək üçün əsas olmadığını bildirib. Censen Huanq da araşdırmaya tam dəstək verəcəyini açıqlayıb.

Qeyd edək ki, "Nvidia" 4,83 trilyon dollarlıq bazar dəyəri ilə dünyanın ən böyük şirkətləri sırasında yer alır və bu göstəriciyə görə yalnız "Apple"dan geri qalır.

Oxşar xəbərlər

"Nvidia" rəhbərinin casusluqla mümkün əlaqəsini araşdırır

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib