Yaponiya Azərbaycanla iqlim şəffaflığı sahəsində əməkdaşlığı daha da inkişaf etdirməyi planlaşdırır.

Bu barədə “Report”a eksklüziv müsahibəsində Yaponiya Ətraf Mühit Nazirliyinin Qlobal Ətraf Mühit Bürosunun nümayəndəsi Akiko Maruo bildirib.

"İlk növbədə, Azərbaycanı COP29-a uğurlu sədrliyi münasibətilə təbrik etmək istərdik. İqlim dəyişikliyinin təsirlərinin azaldılmasına gəldikdə, tərəflərin ambisiyalarını artırmaq üçün Qlobal qiymətləndirməyə diqqət yetirmək vacibdir. Biz bütün tərəfləri 1,5 dərəcə hədəfinə uyğun olan və ən son elmi məlumatlara əsaslanan, bütün istixana qazlarını, sektorları və s. əhatə edən ümumiqtisadi emissiyaların azaldılması hədəflərini müəyyən etməyə çağırırıq. Həmçinin ölkələri, eləcə də böyük iqtisadiyyatları emissiyaların azaldılmasının mütləq göstəricilərini təyin etməyə çağırırıq", - o deyib.

A.Maruo vurğulayıb ki, COP29 çərçivəsində Yaponiya Azərbaycanla birlikdə Qlobal İqlim Şəffaflığı üzrə Bakı Platformasının (BTP) tədbirini təşkil edib: "Biz iqlim təşəbbüslərinin həyata keçirilməsində şəffaflığın təmini üçün Azərbaycanla bu istiqamətdə əməkdaşlığı davam etdirəcəyik".

O xatırladıb ki, Yaponiyanın ətraf mühit naziri Asao Keyitiro COP29 zamanı Bakıda bir çox ölkələrin nümayəndələri ilə ikitərəfli görüşlər keçirərək onları Milli İqlim Planlarının (NDCs) ambisiyalarını artırmağa çağırıb.

"Biz COP29-un yekun plenar iclasında Paris Sazişinin 6-cı Maddəsinin tam təsdiqlənməsindən məmnunuq. Bundan əlavə, Azərbaycan da daxil olmaqla 29 tərəfdaş ölkədə iqlim dəyişikliyinin qarşısının alınması layihələrini təşviq etmək üçün bazar alətlərindən istifadə edən Birgə Kreditləşdirmə Mexanizmimiz (JCM) var. Biz gələcəkdə daha çox JCM layihələri formalaşdırmaq istərdik", - A.Maruo bildirib.

Oxşar xəbərlər

Bakıda COP29-un Liderlər Sammitinin iştirakçılarının qarşılanma mərasimi keçirilib - YENİLƏNİB

Astanada COP29 sədrliyinin təşəbbüsü olan Bakı Qlobal İqlim Şəffaflığı Platformasının təqdimatı keçirilib

İlham Əliyev V “ADEX-2024” və “Securex Caspian” sərgiləri ilə tanış olub - YENİLƏNİB-2

Səfir: Naxçıvanda Yaponiyanın enerjiyə qənaət texnologiyalarının tətbiq ediləcəyi plan hazırlanır

Klassik avtomobillərin yürüşü və sərgisi keçirilib