Terim "Al-Şabab"la danışıqlara başlayıb

Son olaraq Səudiyyə Ərəbistanının "Al-Şabab" klubunu çalışdıran və daha sonra bir müddət fasilə verən təcrübəli mütəxəssis Fatih Terim yenidən yaşıl meydanlara qayıtmağa hazırlaşır. Məlumata görə, Səudiyyə Ərəbistanı Pro Liqası təmsilçisi "Al-Şabab" Terimi yenidən komandanın baş məşqçisi postuna gətirmək üçün hərəkətə keçib.

Far.Az xəbər verir ki, komandanın son nəticələrindən narazı qalan klub rəhbərliyinin Fatih Terimi razı salmaqda qərarlı olduğu və tərəflər arasında rəsmi danışıqlara başlandığı bildirilir. Mənbələrin məlumatına görə, görüşmələr müsbət istiqamətdə davam edir.

Karyerası ərzində "Qalatasaray"la çoxsaylı titullar qazanan, həmçinin "Milan" və "Fiorentina" kimi nüfuzlu klubları çalışdıran "İmperator" ləqəbli mütəxəssis Səudiyyə futbolunda da yaxından tanınan adlardan biridir. "Al-Şabab"ın Fatih Terimə geniş səlahiyyətlər və yüksək məbləğdə maaş təklif etdiyi, razılaşmanın yaxın günlərdə əldə oluna biləcəyi qeyd olunur.

Əgər tərəflər arasında razılıq əldə edilərsə, Fatih Terim karyerasında yeni bir səhifə açaraq Səudiyyə Ərəbistanı Pro Liqasında yenidən fəaliyyətə başlayacaq.