İçərişəhərdə sakinlər və turistlər üçün vahid rəqəmsal xidmət sistemi yaradılıb.

Far.Az report-a istinadən xəbər verir ki, bunu "İçərişəhər" Dövlət Tarixi-Memarlıq Qoruğu İdarəsinin İdarə Heyətinin sədri Rüfət Mahmud Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Azərbaycanda Ağıllı və Davamlı Şəhər Layihələri" tədbirində bildirib.

Onun sözlərinə görə, İçərişəhərdə dövlət xidmətlərinə və sakinlərlə kommunikasiyaya böyük diqqət yetirilir: "Sakinlərin müraciətlərini təqdim edə biləcəyi, gedişatı izləyə biləcəyi və daha şəffaf, hesabatlı bir proses vasitəsilə birbaşa administrasiya ilə əlaqə saxlaya biləcəyi mərkəzləşdirilmiş xidmət mərkəzi modeli yaratdıq. Biz həmçinin hamıya yükləməyi tövsiyə etdiyim "İçərişəhər" mobil tətbiqini istifadəyə verdik ki, bu gün həmin tətbiq həm turistlərə, həm də sakinlərə xidmət edir. Ziyarətçilər çoxdilli naviqasiyadan istifadə edə, muzeylər, tədbirlər cədvəli və mədəniyyət marşrutları haqqında məlumat ala bilərlər; sakinlər isə birbaşa xidmətlər tələb edə və problemlər barədə məlumat verə bilərlər".

Bundan başqa, sədr deyib ki, tezliklə İçərişəhərdə ağıllı monitorinq və təhlükəsizlik sistemləri tətbiq ediləcək: "Lakin bu, "ağıllı qoruq" transformasiyasının yalnız başlanğıcıdır. Növbəti mərhələmizə tarixi şəhər daxilində təhlükəsizliyi, ziyarətçi axınını və qorunma risklərini daha yaxşı idarə etməyə kömək edəcək ağıllı kamera sisteminin və qabaqcıl şəhər monitorinqi alətlərinin tətbiqi daxildir. Söhbət ondan gedir ki, bu sistemlər təkcə təhlükəsizlik baxımından deyil, həm də şəhər idarəetməsi baxımından layihələndirilir və bizə ictimai məkanların real vaxt rejimində necə fəaliyyət göstərdiyini daha yaxşı anlamağa kömək edir".

Oxşar xəbərlər

Bakıda WUF13-ün Sessiyasının açılış mərasimi keçirilib, Prezident İlham Əliyev çıxış edib

Leyla Əliyeva və Arzu Əliyeva Şəkidə tarixi-memarlıq abidələrinin bərpadan sonra açılışında iştirak ediblər

Bakıda Ümumdünya Şəhərsalma Forumunun 13-cü Sessiyasının açılış mərasimi keçirilir Prezident İlham Əliyev çıxış edib

Prezident İlham Əliyev Bakı Olimpiya Stadionunun ərazisində WUF13 ilə bağlı görülən işlərlə tanış olub

Bakıda WUF13-ün açılış mərasimi keçirilir, Prezident İlham Əliyev tədbirdə çıxış edib