Azərbaycan Avropanın enerji bazarı üçün həlledici mənbədir.

Bunu "Far.Az"un Şərqi Avropa bürosuna açıqlamasında Azərbaycana səfərdən qayıdan Moldovanın energetika naziri Dorin Junqetu bildirib.

Nazirin sözlərinə görə, Moldova hazırda xarici enerji asılılığının azaldılması və Avropa enerji bazarına inteqrasiya istiqamətində ciddi transformasiya prosesindən keçir:

"Moldova hazırda xarici enerji asılılığında Avropa bazarına doğru ciddi dəyişikliklər edir. Bu bazarda Azərbaycan həlledici mənbədir. Xüsusilə forum çərçivəsində keçirilən görüşlərdə Moldova olaraq bu məsələyə və Qara dəniz hövzəsində enerji dövriyyəsi mövzusuna xüsusi önəm verdik".

O qeyd edib ki, səfər çərçivəsində Azərbaycanın iqtisadiyyat naziri Mikayıl Cabbarov və Azərbaycan Dövlət Neft Şirkətinin (SOCAR) yüksək səviyyəli nümayəndələri ilə görüşlər keçirilib. Onun sözlərinə görə, danışıqlar Moldova ilə Azərbaycan arasında iqtisadi və enerji əməkdaşlığının genişləndirilməsi, o cümlədən bərpa olunan enerji və strateji regional layihələr üzrə əməkdaşlıq imkanlarının müzakirəsinə həsr olunub.

"SOCAR ilə Moldovanın rəqabətli şərtlərlə neft məhsulları və təbii qazla təchizatı sahəsində əməkdaşlıq perspektivlərini, eləcə də Azərbaycan investisiyalarının ölkənin energetika sektoruna cəlb olunması imkanlarını müzakirə etdik", – nazir bildirib.

D. Junqetu əlavə edib ki, Azərbaycan nümayəndə heyəti ilə görüş zamanı yaşıl enerji sahəsində regional layihələrə də xüsusi diqqət yetirilib.

"Bu çərçivədə bərpa olunan enerji mənbələrindən istehsal olunan elektrik enerjisinin Avropa bazarına nəqli üçün nəzərdə tutulan Azərbaycan–Gürcüstan–Rumıniya–Macarıstan Yaşıl Enerji Dəhlizi layihəsini də müzakirə etdik", – o vurğulayıb.

Qeyd edək ki, Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Trans-Xəzər Forumunda onlayn formatda çıxışı zamanı bildirib ki, Körfəz bölgəsində və Yaxın Şərqdə münaqişənin kəskinləşməsi şəraitində Orta Dəhliz əlavə əhəmiyyət qazanır.

Oxşar xəbərlər

SOCAR-ın təşkilatçılığı, "Neftçi" və "Galatasaray" klublarının tərəfdaşlığı ilə şəhid və qazi övladları üçün "Futbol günü" adlı tədbir keçirilib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Vətən müharibəsində Qələbənin beşinci ildönümünə həsr olunmuş Hərbi parad keçirilib

Mərkəzi Bank tərəfindən media nümayəndələri üçün "Kapital bazarlarının əsasları" mövzusunda təlim keçirilib