Şimali Makedoniya Şaquli Qaz Dəhlizinə qoşulur.

Bu barədə "Report"un Balkan bürosuna ölkənin Energetika, Mədənçilik və Mineral Ehtiyatlar Nazirliyindən bildirilib.

Qeyd edilib ki, Şimali Makedoniya enerji təhlükəsizliyinin gücləndirilməsi və regional əlaqəliliyin artırılması istiqamətində yeni strateji addım atıb.

Belə ki, ölkə təbii qaz təchizatının şaxələndirilməsi və Cənub-Şərqi, Mərkəzi və Şərqi Avropada enerji sabitliyinin gücləndirilməsi məqsədi daşıyan Avropanın ən mühüm təşəbbüslərindən biri olan Şaquli Qaz Dəhlizinə qoşulmaq üçün dəvət alıb.

Qərar Afinada keçirilən qaz ötürücü sistem operatorlarının iclasında təsdiqlənib. İclasda Şimali Makedoniyanın qaz ötürücü sistem operatoru NOMAGAS-ın bu regional əməkdaşlıq çərçivəsinə qoşulması barədə razılıq əldə olunub. Təşəbbüsün iştirakçıları olan Yunanıstan, Bolqarıstan, Rumıniya, Moldova, Ukrayna, Slovakiya və Macarıstanla yanaşı, Şimali Makedoniya və Serbiya da hazırda qoşulma prosesindədir.

Energetika, Mədənçilik və Mineral Ehtiyatlar Nazirliyinin qiymətləndirməsinə görə, bu addım ölkənin Avropa enerji şəbəkəsinin fəal hissəsinə çevrilməsi, etibarlı, şaxələndirilmiş və rəqabətqabiliyyətli təbii qaz təchizatının təmin edilməsi istiqamətində strateji məqsədlərin həyata keçirilməsində mühüm mərhələdir.

Diqqətə çatdırılıb ki, Şaquli Qaz Dəhlizinə qoşulmaq yeni vahid qaz kəmərinin tikintisi demək deyil. Bu, milli qaz kəmərləri, interkonnektorlar və terminallardan ibarət koordinasiyalı Avropa şəbəkəsinə inteqrasiyanı nəzərdə tutur. Bu şəbəkə vasitəsilə təbii qaz Avropada cənubdan şimala doğru müxtəlif marşrutlarla nəql edilə biləcək.

Qeyd edək ki, Azərbaycan qazı Cənub Qaz Dəhlizi vasitəsilə Avropaya nəql olunur və Şaquli Qaz Dəhlizinin inkişafı bu resursların daha geniş coğrafiyaya çatdırılmasına əlavə imkanlar yaradacaq.

Oxşar xəbərlər

Prezident İlham Əliyev "AZWOOL" mineral daş yunu zavodunun açılışında iştirak edib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında iştirak edib

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında çıxış edib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2