Bu gün Türkiyə Cümhuriyyətinin qurucusu, ölkənin ilk prezidenti Mustafa Kamal Atatürkün vəfatından 88 il ötür.

Far.Az xəbər verir ki, Mustafa Kamal Atatürk 1881-ci ildə Osmanlı imperiyasının tərkibində olan Saloniki şəhərində dünyaya gəlib.

Hərbçi kimi fəaliyyətə başlayan Atatürk Birinci Dünya müharibəsi dövründə Çanaqqala döyüşlərində göstərdiyi komandanlıqla tanınıb. Osmanlı imperiyasının müharibədə məğlubiyyətindən sonra Anadolu torpaqlarının işğalına qarşı başlanan milli mübarizəyə rəhbərlik edib.

1919-cu il mayın 19-da Samsuna çıxması Türkiyənin istiqlal mübarizəsinin başlanğıc mərhələsi kimi tarixə düşüb. Onun rəhbərliyi ilə aparılan Qurtuluş savaşı nəticəsində Türkiyə müstəqilliyini qoruyub və yeni dövlətin qurulması üçün zəmin yaranıb.

1923-cü il oktyabrın 29-da Türkiyə Cümhuriyyəti elan edilib və Mustafa Kamal Atatürk ölkənin ilk prezidenti seçilib. O, 1938-ci ilədək bu vəzifədə çalışıb.

Atatürk prezidentliyi dövründə Türkiyənin siyasi, hüquqi, təhsil və sosial həyatında genişmiqyaslı islahatlar həyata keçirib. Onun təşəbbüsü ilə ölkədə dünyəvi dövlət quruculuğu istiqamətində mühüm dəyişikliklər edilib, təhsil sistemi yenilənib, qadınların ictimai və siyasi həyatda iştirak imkanları genişləndirilib.

Mustafa Kamal Atatürk 1938-ci il noyabrın 10-da İstanbulun Dolmabağça sarayında, saat 09:05-də vəfat edib. Onun ölümü Türkiyədə və dünyanın müxtəlif ölkələrində böyük kədər doğurub.

Atatürkün nəşi əvvəlcə Ankaradakı Etnoqrafiya Muzeyində müvəqqəti olaraq dəfn edilib. 1953-cü il noyabrın 10-da isə Anıtkabirə köçürülüb.

Hər il noyabrın 10-da Türkiyədə Atatürkün xatirəsi ehtiramla yad edilir. Saat 09:05-də ölkənin müxtəlif şəhərlərində həyatın axarı dayanır, nəqliyyat vasitələri və insanlar Atatürkün xatirəsini bir dəqiqəlik sükutla anırlar.

Mustafa Kamal Atatürk Türkiyə tarixində müstəqillik mübarizəsinin rəhbəri, Cümhuriyyətin qurucusu və ölkənin modernləşmə prosesinin əsas simalarından biri kimi xatırlanır.

Oxşar xəbərlər

Leyla Əliyeva "Onlardan biri: Emil" adlı anım tədbirində iştirak edib

Azərbaycanlıların yaşadığı Leyliqaçan: 1919-cu ilin faciəsi və unudulmuş kəndin izləri

Şəhid ailələri Türkiyənin Çanaqqala şəhərini ziyarət ediblər

27 Sentyabr - Anım Günü münasibətilə Azərbaycan Ordusunda silsilə tədbirlər keçirilib

Xalq artisti Telman Adıgözəlovun vəfatından 16 il ötür