"Qazaxıstan" telekanalı Azərbaycan telekanalları ilə əməkdaşlığın genişləndirilməsində, o cümlədən birgə media layihələrinin həyata keçirilməsində və kontent mübadiləsində maraqlıdır.

BAKU.WS report-a istinadən xəbər verir ki, bunu "Qazaxıstan" telekanalının İdarə Heyəti sədrinin müavini Erkin Muxametjanov müsahibəsində bildirib.

Onun sözlərinə görə, telekanal Türk dünyası ölkələrinin, o cümlədən Azərbaycanın media qurumları ilə sıx əlaqələrə malikdir.

"Biz bunda maraqlıyıq və azərbaycanlı qardaşlarımızla, qardaş xalqların televiziyası ilə sıx əməkdaşlığa hazırıq", - Muxametjanov Daşkənddə keçirilən Beynəlxalq Media Forumu çərçivəsində bildirib.

O qeyd edib ki, "Qazaxıstan" telekanalı ilə Azərbaycanın dövlət telekanalı arasında əməkdaşlıq memorandumu qüvvədədir.

Muxametjanov həmçinin bildirib ki, "Qazaxıstan" telekanalının Türk xalqlarının mədəni irsinə həsr olunmuş sənədli filmi efirə getdikdən sonra Azərbaycanda da nümayiş etdirilə bilər.

"Bu, sadəcə vaxt məsələsidir. Əvvəlcə filmi öz auditoriyamıza təqdim edəcək və onun reaksiyasını öyrənəcəyik", - o qeyd edib.

Türk dünyasının ortaq telekanalının yaradılmasından danışan Muxametjanov bu ideyanın artıq uzun illərdir müzakirə olunduğunu xatırladıb.

"Biz məzmun mübadiləsi vasitəsilə bir-birimizi dəstəkləyə, çəkiliş meydançaları təqdim edə və lazımi köməklik göstərə biləcəyik", - o bildirib.

Muxametjanov vurğulayıb ki, "Qazaxıstan" telekanalının sənədli layihəsi Türk xalqlarının ortaq mədəni əlaqələrinin nümayiş etdirilməsinə xidmət edir.

"Bu layihə ilə bizi yalnız tarix və dilin deyil, həm də mədəniyyət sahəsində sıx əlaqələrin birləşdirdiyini bir daha sübut etmək istəyirik", - o əlavə edib.

Oxşar xəbərlər

Bakıda Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin açılış mərasimi olub

Vətən müharibəsində Qələbənin beşinci ildönümünə həsr olunmuş Hərbi parad keçirilib

Leyla Əliyeva "Hirkan" sənədli filminin təqdimatında iştirak edib

"Qazaxıstan" telekanalı Azərbaycanla birgə media layihələrində maraqlıdır - EKSKLÜZİV

Arzu Əliyeva "Harmoniya" sənədli filminin təqdimatında iştirak edib