Azərbaycanın xarici işlər naziri Ceyhun Bayramov BMT Baş Assambleyasının 81-ci sessiyası çərçivəsində Seneqalın Afrika İnteqrasiyası, xarici işlər və xaricdəki seneqallılar üzrə naziri Şeyx Nianq ilə görüşərək, Azərbaycan-Seneqal ikitərəfli gündəliyini və əməkdaşlığın daha da dərinləşdirilməsi imkanlarını müzakirə edib.

"Far.Az" xəbər verir ki, bu barədə Azərbaycanın Xarici İşlər Nazirliyi (XİN) "X" sosial şəbəkəsində məlumat yayıb.

Tərəflər daha güclü siyasi dialoq və qarşılıqlı səfərlərin intensivləşdirilməsi perspektivlərini nəzərdən keçiriblər. Müzakirələr zamanı rəqəmsal idarəetmə və innovasiya sahələrində yüksək səviyyəli əməkdaşlıqla yanaşı, iqtisadi əlaqələrin struktur çərçivəsinin genişləndirilməsinin vacibliyi vurğulanıb.

Nazirlər həmçinin BMT və Qoşulmama Hərəkatı çərçivəsində Azərbaycan və Seneqal arasında uzunmüddətli əməkdaşlığı və qarşılıqlı dəstəyi yüksək qiymətləndirib, çoxtərəfli platformalarda əlaqələrin daha da gücləndirilməsində maraqlı olduqlarını ifadə ediblər.

Müzakirələrdən sonra nazirlər "Azərbaycan Respublikasının Xarici İşlər Nazirliyi ilə Seneqal Respublikasının Afrika İnteqrasiyası, Xarici İşlər və Xaricdəki Seneqallılar üzrə Nazirliyi arasında siyasi məsləhətləşmələrə dair Anlaşma Memorandumu"nu imzalayıblar.

Bu sənəd müntəzəm dialoqun saxlanılmasında və ikitərəfli münasibətlərimizin siyasi çərçivəsinin gücləndirilməsində mühüm rol oynayacaq.

Oxşar xəbərlər

İlham Əliyev Şeyx Məhəmməd bin Zayed Al Nəhyana Qarabağ atı hədiyyə edib

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Heydər Əliyev Fondunun dəstəyi ilə alınan musiqi alətlərinin təqdimatı olub

MÜSİAD Azərbaycanla VİDAL Özəl Sənaye Məhəlləsi arasında memorandum imzalandı

Ceyhun Bayramov İrpendə Azərbaycanın dəstəyi ilə bərpa olunan obyektlərdə olub