Kəkələmə deyəndə çox vaxt uşaqlıq dövrü ağla gəlir. Amma bəzən insan böyüyəndən sonra, heç vaxt belə problemi olmamışkən də kəkələməyə başlaya bilər. Bunun ən çox rast gəlinən səbəblərindən biri stress və güclü psixoloji gərginlikdir.

Bu barədə defektoloq-loqoped Fatimə Məmmədova Far.Az-ə bildirib. Onun sözlərinə görə, uzun müddət yığılan stress, qorxu, əsəb, narahatlıq və ya ağır bir hadisə insanın danışığına da təsir göstərə bilər.

"İnsan daxildən gərgin olanda, beyin və danışıq arasında olan əlaqə zəifləyir. Nəticədə sözlər rahat çıxmır, danışıq tutulur, hecalar təkrarlanır.

Stressdən yaranan kəkələmə adətən birdən ortaya çıxır. İnsan danışmaq istədikcə daha çox həyəcanlanır və bu da vəziyyəti daha da ağırlaşdırır", - deyə mütəxəssis bildirib.

Qeyd edək ki, utanc hissi, "yenə kəkələyəcəm" qorxusu, qarşısındakının reaksiyasından çəkinmə danışığı daha da çətinləşdirir.

Fatimə Məmmədova deyir ki, bu tip kəkələmə çox vaxt insan sakit olanda azalır, tək qalanda və ya güvəndiyi insanlarla danışanda yüngülləşir:

"Kütlə içində, tanımadığı adamlarla danışarkən və ya gərgin situasiyalarda daha çox hiss olunur.

Stress mənşəli kəkələmə təkcə danışıq problemi deyil. O, insanın özünə inamını azalda, sosial münasibətlərdən qaçmasına səbəb ola, içindəki gərginliyi daha da artıra bilər.

Ən önəmlisi isə budur ki, bu vəziyyət düzələ biləndir. İnsan stressin mənbəyini tanıyıb onun üzərində işlədikdə, eyni zamanda danışıqla bağlı düzgün dəstək aldıqda, kəkələmə tədricən azalır. Erkən müdaxilə olarsa, problem qalıcı hala keçmədən aradan qalxa bilər.

Kəkələmə utanılacaq bir hal deyil. Çox vaxt bu, insanın içində daşıdığı gərginliyin səsidir və doğru yanaşma ilə həllini tapır".

Ziya SƏCCAD

Oxşar xəbərlər

Həyatda yaxşı şeyləri niyə görmürük? - Tanınmış simaların FİKİRLƏRİ

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

Paytaxtda sakinlər üçün təhlükə mənbəyi olan ÜNVANLAR - "Qorxu içində gəzirik"