Mənzil siyasəti yoxsulluğun azaldılması, iqtisadi böhranlardan çıxış və postmünaqişə bərpasında əsas rol oynayır.

"Far.Az" xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Davamlı mənzil və dayanıqlı şəhərlər üçün ən yaxşı həll yollarının axtarışında: Şəhərlərin səsləri" adlı tədbirdə bildirib.

O qeyd edib ki, mənzil müxtəlif sistemlərin kəsişməsində yerləşir və bu sahədə məsuliyyətli idarəetmə olmadan uğur qazanmaq mümkün deyil: "Mənzil sosial məsələ olmaqla yanaşı, həm də ətraf mühit, şəhərsalma və torpaq idarəçiliyi məsələsidir. Buna görə də məsuliyyətli liderlik vacibdir".

A.Rossbax tarix boyu böyük sosial-iqtisadi dönüş nöqtələrində mənzil sektorunun əsas rol oynadığını bildirib: "II Dünya müharibəsindən sonra Avropanın bərpasında mənzil əsas giriş nöqtəsi oldu. Marşall Planı çərçivəsində dövlət vəsaiti hesabına geniş mənzil tikintisi həyata keçirildi və bu, bütün iqtisadiyyatın canlanmasına təkan verdi. Çində urbanizasiya və mənzil siyasəti yüz milyonlarla insanın yoxsulluqdan çıxmasına kömək edib və ölkənin iqtisadi artımında mühüm rol oynayıb. ABŞ-də 1930-cu illərin böhranından sonra mənzil maliyyələşdirmə sistemi iqtisadi bərpa aləti kimi formalaşdırılıb, Braziliyada isə 2008-ci il qlobal maliyyə böhranından sonra qeyri-rəsmi yaşayış məntəqələrinin yaxşılaşdırılması və mənzil siyasəti iqtisadi dirçəliş strategiyasına çevrilib".

A.Rossbax vurğulayıb ki, 2050-ci ilə qədər daha 2 milyard insan şəhərlərə köçəcək və bu artım əsasən Cənub-Şərqi Asiya və Afrikada müşahidə olunacaq: "Hazırda Afrikada şəhər əhalisinin orta hesabla 50 %-i gecəqondu və qeyri-rəsmi yaşayış məntəqələrində yaşayır. İnsanlar mənzillə təmin olunmadan sənaye inkişafını gözləmək mümkün deyil. Qeyri-rəsmi yaşayış məntəqələrinin yaxşılaşdırılması yerli iqtisadi inkişafı stimullaşdırır, yeni iş yerləri yaradır və kiçik sahibkarlığın inkişafına şərait yaradır. Xüsusilə qadın sahibkarlar üçün ev əsaslı biznes imkanları formalaşır. Mənzilə investisiya həm ÜDM-ə, həm də ailələrin gəlirlərinin artmasına müsbət təsir göstərir".

Oxşar xəbərlər

Bakıda WUF13-ün Sessiyasının açılış mərasimi keçirilib, Prezident İlham Əliyev çıxış edib

Bakıda WUF13-ün açılış mərasimi keçirilir, Prezident İlham Əliyev tədbirdə çıxış edib

Bakıda Ümumdünya Şəhərsalma Forumunun 13-cü Sessiyasının açılış mərasimi keçirilir Prezident İlham Əliyev çıxış edib

Bakıda WUF13-ün Sessiyasının açılış mərasimi keçirilib, Prezident İlham Əliyev çıxış edib - YENİLƏNİB-4

Prezident İlham Əliyev Bakı Olimpiya Stadionunun ərazisində WUF13 ilə bağlı görülən işlərlə tanış olub