Özəl sektor dayanıqlı şəhərlərin qurulmasında aparıcı qüvvəyə çevrilir.

BAKU.WS "Report"a istinadən xəbər verir ki, bunu "Azərbaycan Tikinti Materialları İstehsalçıları Assosiasiyası" İctimai Birliyinin Baş Katibi Sevda Quliyeva Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Özəl sektor davamlı şəhərlərin inkişafının aparıcı qüvvəsi kimi" adlı tədbirdə bildirib.

Onun sözlərinə görə, bu gün qlobal şəhərsalma, dayanıqlı tikinti, innovativ materiallar və yaşıl iqtisadiyyat məsələləri dünya gündəminin əsas mövzuları sırasındadır: "Belə bir dövrdə sektor nümayəndələri arasında əməkdaşlığın genişləndirilməsi, təcrübə mübadiləsinin təşviqi və yeni tərəfdaşlıqların qurulması xüsusi əhəmiyyət daşıyır. ATMİA olaraq şirkətlərə həm ölkə daxilində, həm də beynəlxalq bazarlarda yeni işgüzar əlaqələrin qurulması, satış və ixrac imkanlarının genişləndirilməsi, eləcə də etibarlı tərəfdaşların müəyyənləşdirilməsi istiqamətində dəstək göstəririk. Assosiasiyamız dövlət və özəl sektor əməkdaşlığının gücləndirilməsi məqsədilə biznes görüşləri, B2B formatlı görüşlər, xarici və regional səfərlər, beynəlxalq sərgilər və forumlar təşkil edir. Bu təşəbbüslər şirkətlər arasında dayanıqlı əməkdaşlıq mühitinin formalaşmasına mühüm töhfə verir".

"Eyni zamanda, "Made in Azerbaijan" brendinin beynəlxalq bazarlarda tanıdılması, yerli məhsulların təqdimatı və ixrac potensialının artırılması istiqamətində fəaliyyətimizi davam etdiririk. Bu istiqamətdə sosial məsuliyyət məsələsində də özəl sektorun rolu xüsusi vurğulanmalıdır. Bir çox şirkətlər sosial inklüzivliyin gücləndirilməsi, məşğulluq imkanlarının artırılması, qadınların iqtisadi fəallığının dəstəklənməsi və icmaların inkişafı istiqamətində müxtəlif layihələr həyata keçirirlər. Bu təşəbbüslər şəhərlərdə sosial bərabərliyin və rifahın möhkəmlənməsinə dəstək verir. Ümumilikdə, dövlət və özəl sektor arasında əməkdaşlıq dayanıqlı şəhərlərin qurulmasının əsas şərtlərindən biridir və bu prosesdə özəl sektorun aparıcı rolu böyük əhəmiyyət daşıyır", - deyə Baş katib əlavə edib.

Onun sözlərinə görə, davamlı şəhərlərin qurulmasında investisiya və innovasiya önə çıxır: "Dayanıqlı şəhər qurulmasında özəl sektorun rolu çox böyükdür. Belə ki, dünyada şəhərsalmanın sürətlə artdığı bir dövrdə şəhərlərin ekoloji, sosial və iqtisadi baxımdan davamlı inkişafı yalnız dövlət qurumlarının deyil, eyni zamanda özəl sektorun fəal iştirakı ilə mümkündür. Özəl sektor innovasiya, investisiya və texnoloji imkanları ilə dayanıqlı şəhərlərin formalaşmasında əsas tərəfdaşlar kimi iştirak edirlər".

Oxşar xəbərlər

Bakıda WUF13-ün Sessiyasının açılış mərasimi keçirilib, Prezident İlham Əliyev çıxış edib

Bakıda WUF13-ün açılış mərasimi keçirilir, Prezident İlham Əliyev tədbirdə çıxış edib

Bakıda Ümumdünya Şəhərsalma Forumunun 13-cü Sessiyasının açılış mərasimi keçirilir Prezident İlham Əliyev çıxış edib

WUF13-ün beşinci günündən maraqlı anlar - FOTOREPORTAJ

Prezident İlham Əliyev Bakı Olimpiya Stadionunun ərazisində WUF13 ilə bağlı görülən işlərlə tanış olub