Son 6 ayda Azərbaycan üzrə 2 000 zərərli kontent yayan resurs zərərsizləşdirilib.

Far.Az "Report"a istinadən xəbər verir ki, bunu rəqəmsal inkişaf və nəqliyyat nazirinin müavini Saməddin Əsədov Bakıda keçirilən IV Milli Kibertəhlükəsizlik Forumunda bildirib.

O qeyd edib ki, hesabat dövründə eyni zamanda 200 iri DDoS hücumu zərərsizləşdirilib, eyni zamanda, 1,5 milyondan çox informasiya sızması aşkarlanıb və 160 min botnet şəbəkəsi fəaliyyətinin qarşısı alınıb: "Ötən dövrlərdə ölkə səviyyəsində kiber təhlükəsizliklə bağlı məlumat mübadiləsinin həyata keçirilməsi və informasiya məkanının müasir təhdidlərdən və kiber hücumlardan qorunması məqsədilə Vahid Kiber Təhlükəsizlik Platforması yaradılıb. Hazırda 50-dən çox qurum bu platformaya qoşulub, şəbəkənin daha da genişləndirilməsi aparılır".

Nazir müavininin sözlərinə görə, kiber təhlükəsizlik yalnız texniki həllərlə təmin edilmir: "Bu sahədə insan amili həlledici rol oynayır. Məhz buna görə də maarifləndirmə fəaliyyəti xüsusi əhəmiyyət daşıyır. Ötən dövr ərzində ölkədə 705-dən çox maarifləndirmə tədbiri keçirilib, təxminən 48 min vətəndaş kiber təhlükəsizlik mövzusunda məlumatlandırılıb. Son 3 il ərzində Azərbaycan Kiber Təhlükəsizlik Mərkəzində 360-a yaxın mütəxəssis hazırlanıb, onların 86 %-nin artıq işə qəbul olması barədə məlumatımız var. Dövlət və özəl qurumlarda 120 kiber təhlükəsizlik mütəxəssisi ixtisasartırma proqramına cəlb olunub və 53 təşkilatda kiber maarifləndirmə təlimləri həyata keçirilib".

Oxşar xəbərlər

Bakının mərkəzində əyləncə məkanının fəaliyyəti dayandırıldı

“Dövlət informasiya ehtiyatlarının və sistemlərinin Nümunəvi Əsasnaməsi” təsdiq edilib

Şəhərlər üçün texnologiyalar: "Yango Group" Bakıda keçirilən WUF13 forumunda şəhər mühitinin inkişafına yönəlmiş həllər təqdim edib

Lökbatandakı yanğına helikopterlər indiyədək 200 ton su töküb - YENİLƏNİB-4

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN