Paytaxtın Nərimanov rayonu, Təbriz küçəsi, 95 ünvanında fəaliyyət göstərən onlarla sahibkar obyektlərinin gələcək taleyindən narahatdır.

Sahibkarların sözlərinə görə, təxminən iki ay əvvəl ərazidə yeni layihənin həyata keçiriləcəyi bildirilib və onlardan obyektləri boşaltmaları tələb olunub.

Bu barədə Baku TV-nin videomaterialında deyilir.

Həmin vaxtdan telefon təmiri, saat və müxtəlif aksesuarların satışı ilə məşğul olan ticarət obyektlərinin fəaliyyəti dayandırılıb. Ərazi hazırda hasara alınsa da, sahibkarlar burada real işlərin aparılmadığını bildirirlər. Onların sözlərinə görə, obyektlərin elektrik, su və qaz təchizatı da kəsilib. Sahibkar Qabil Qasımov bildirib ki, obyekt üzərində rəsmi mülkiyyət hüququna malikdir:

"Obyektin rəsmi çıxarışı var. Burada 2010-2011-ci illərdən fəaliyyət göstəririk. Bizə yalnız dövlət layihəsinin həyata keçiriləcəyi və obyekti boşaltmalı olduğumuz deyildi. Lakin bundan əvvəl mülkiyyətçilərlə razılıq əldə olunmalı, kompensasiya və ya alternativ yer məsələsi müzakirə edilməli idi".

Onun sözlərinə görə, obyektlərin boşaldılması nəticəsində sahibkarlara ciddi maddi ziyan dəyib:

"Buraya onminlərlə manat vəsait qoymuşuq. Təmir, kondisioner, işıqlandırma sistemi və mallarımız yararsız vəziyyətə düşüb. İki aydır işləyə bilmirik və gəlir əldə etmirik".

Sahibkarlar məsələ ilə bağlı Bakı Şəhər İcra Hakimiyyətinə və Nərimanov Rayon İcra Hakimiyyətinə müraciət etdiklərini deyirlər. Bildirilib ki, onlara layihə ilə bağlı gözləmələri tövsiyə olunub.

"Kim bizi çağıracaq, nə vaxt çağıracaq, yerimiz bərpa olunacaq, yoxsa kompensasiya veriləcək - bunların heç biri barədə məlumat yoxdur. Sadəcə, gözləməyimiz tələb olunur", - Qabil Qasımov qeyd edib.

Oxşar xəbərlər

Bakıda avtomobil təmiri sexinin fəaliyyəti dayandırılıb

Bakıda kosmetoloji vasitələrin satışı anbarının fəaliyyəti dayandırılıb

Bu gün paytaxtın 555 küçəsi yuyuldu

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Həyatda yaxşı şeyləri niyə görmürük? - Tanınmış simaların FİKİRLƏRİ