Əfsanəvi aktyor Ceki Çan beynəlxalq macəra filmi **"Tanrının Zirehi 4: Ultimatum"**un bəzi səhnələrinin çəkilişləri üçün Bakıya gəlib.

Far.Az Qazaxıstanın Bakıdakı səfirliyinə istinadən xəbər verir ki, aktyorun Azərbaycanın paytaxtında təxminən on gün qalacağı bildirilir.

Filmin əsas çəkiliş meydançası Qazaxıstandır. Ekran əsərinin çəkilişləri artıq Manqistau və Almatı vilayətlərində, eləcə də Almatı şəhərində aparılıb. Azərbaycan isə Qazaxıstan tərəfinin təklifi ilə çəkilişlərin keçiriləcəyi ikinci ölkə seçilib.

Filmin istehsalını Qazaxıstanın Salem Entertainment kinostudiyası həyata keçirir. Layihənin prodüseri şirkətin təsisçisi Rüstəm Omarov, rejissoru isə namizədliyi şəxsən Ceki Çan tərəfindən təsdiqlənmiş qazaxıstanlı rejissor və kaskadyor Robert Kundur. Bakıda çəkilişlərin təşkilinə Qazaxıstanın Azərbaycandakı səfirliyi dəstək verir.

Bakıda çəkilişlər üçün şəhərin ən tanınmış məkanları seçilib. Filmdə İçərişəhər, Dağüstü park, Bakı funikulyoru, Yaşıl Teatr və Fəvvarələr meydanı yer alacaq.

Layihə Qazaxıstan və Azərbaycanın iştirakı ilə həyata keçirilir və son illərdə Mərkəzi Asiya ilə Cənubi Qafqazda ərsəyə gətirilən ən iri beynəlxalq kino layihələrindən biri hesab olunur. Hər iki ölkənin çəkilişlərdə iştirakı kino sənayesi sahəsində regional əməkdaşlığın genişlənməsini əks etdirir və onların mədəni-turizm potensialının beynəlxalq səviyyədə tanıdılması üçün əlavə imkanlar yaradır.

"Tanrının Zirehi 4: Ultimatum" məşhur film seriyasının davamıdır. Ceki Çan 13 ildən sonra yenidən "Asiya şahini" ləqəbli əfsanəvi macəraçı obrazını canlandıracaq. Filmin premyerası 2027-ci ildə nəzərdə tutulur.

Qalereya

Oxşar xəbərlər

Leyla Əliyeva "Hirkan" sənədli filminin təqdimatında iştirak edib

Anar Ələkbərov "44" bədii filminin çəkilişlərinin başa çatması barədə paylaşım edib

Bakıdakı hərbi paraddan maraqlı FOTOLAR

Arzu Əliyeva "Harmoniya" sənədli filminin təqdimatında iştirak edib

Kiyevə raket hücumu zamanı Azərbaycanın Ukraynadakı səfirliyinə ciddi ziyan dəyib