Maksim Tank adına Belarus Dövlət Pedaqoji Universitetində Diasporla İş üzrə Dövlət Komitəsinin texniki-təşkilati dəstək göstərdiyi Azərbaycan Dili və Mədəniyyəti Mərkəzinin təşəbbüsü ilə nar bayramı qeyd olunub.

Bu barədə "Report"a Diasporla İş üzrə Dövlət Komitəsindən məlumat verilib.

Bildirilib ki, bayramda Belarusun Din və millətlər üzrə səlahiyyətli nümayəndəsi Aleksandr Rumak, Belarus Azərbaycan İcmaları Konqresinin üzvləri, Azərbaycanın Belarusdakı Səfirliyinin, BMT-nin Belarusdakı Nümayəndəliyinin, Türkmənistanın Bahar Mədəniyyət və Təhsil Fondunun təmsilçiləri, UNİCEF-in Belarusdakı nümayəndələri və universitet tələbələri iştirak edib.

Tədbirin təşkilində məqsəd Azərbaycanla Belarus xalqları arasında təhsil, elm və mədəniyyət sahəsində əməkdaşlığı gücləndirmək, həmçinin universitetin qarşıdan gələn 110 illiyini qeyd etmək olub.

"Bizim dostluğumuz ölkədə sabitləşdirici amildir," – Belarusun Din və millətlər üzrə səlahiyyətli nümayəndəsi Aleksandr Rumak qeyd edib.

Universitetin rektoru Aleksandr Juk təhsil müəssisəsinin elm, təhsil və mədəniyyət sahələrində Azərbaycan ilə sıx əməkdaşlıq etdiyini, burada Azərbaycan dili mərkəzinin açıldığını, 2014-cü ildə isə Bakı Slavyan Universitetində Belarus dili və mədəniyyəti mərkəzinin yaradıldığını diqqətə çatdırıb.

Bayram tədbirində universitetin yaradıcı kollektivi konsert proqramı ilə çıxış edib, milli rəqslər nümayiş olunub, həm Azərbaycan, həm də Belarus dillərində şeir və mahnılar səsləndirilib.

Tədbirdə, həmçinin Azərbaycanın görkəmli rəssamı Toğrul Nərimanbəyovun nar təsvirli rəsmlərindən ibarət sərgi təşkil olunub.

Oxşar xəbərlər

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

Rektor: Türkiyə-Azərbaycan Universitetindəki yeni nəsil təhsil sistemi interaktiv və ağıllı modeldir - MÜSAHİBƏ

Özbəkistanın mədəniyyət naziri: Xalqlarımızı birləşdirən fundamental dəyər mədəniyyətdir - MÜSAHİBƏ

UNICEF-in direktor müavini: Azərbaycan uğurlu COP tədbirinə ev sahibliyi edəcək

Prezident İlham Əliyev Cəbrayıl şəhərində inşa olunan yaşayış kompleksinin açılışında iştirak edib - YENİLƏNİB-2