Orta Dəhlizin strateji əhəmiyyəti iştirakçı ölkələrin ərazisindən keçən yüklərlə deyil, yaradılacaq iqtisadi dəyərlə ölçüləcək.

"Far.Az" xəbər verir ki, bunu Türkiyənin Xarici İşlər Nazirliyinin Strateji Araşdırmalar Mərkəzinin (SAM) rəhbəri Ramazan Erdağ Bakıda keçirilən Türk Dövlətləri Təşkilatının Aparıcı Milli Analitik Mərkəzlərinin II Beynəlxalq Konfransında bildirib.

Onun sözlərinə görə, Orta Dəhliz sadəcə alternativ tranzit marşrutu deyil və olmamalıdır: "O, bazarları, standartları, istehsal şəbəkələrini, energetika sistemlərini, rəqəmsal infrastrukturu və nəhayət, cəmiyyətlərimizi birləşdirən inteqrasiya hərəkətvericisi olmalıdır. Geosiyasi qeyri-müəyyənlik, təchizat zəncirlərindəki kəsintilər, diversifikasiyaya artan ehtiyac dövründə Asiya ilə Avropa arasında sabit, təhlükəsiz və özünü təmin edən əlaqəyə tələbat hər zamankından daha aydın görünür. Orta Dəhlizin həqiqi uğuru, bu günün dəqiq mesajı ondan ibarətdir ki, onun strateji dəyəri yalnız ərazimizdən keçən yüklərlə deyil, sərhədləri aşan və böyüyən iqtisadi dəyərlə ölçüləcək. "Türk Dünyası Baxışı 2040" sənədi daha böyük siyasi həmrəylik, uyğunlaşdırılmış iqtisadi siyasətlər və bir-birinə uyğun tənzimləyici çərçivələr vasitəsilə daha dərin inteqrasiyaya çağırır. Bu səbəbdən əlaqələndirmə bu baxış çərçivəsində tək bir məsələ deyil, əsas sütunlardan biridir".

R.Erdağ onu da deyib ki, tranzit coğrafiyasından regional dəyər zəncirlərinə keçiddə növbəti addım tranzit mərkəzli yanaşmadan dəyər zənciri yanaşmasına keçməkdir: "Uğurlu dəhlizlər sadəcə konteynerləri daha sürətlə daşımır, onlar iqtisadi coğrafiyanı yenidən təşkil edirlər. Buna görə siyasət sınağı yalnız nə qədər yükün keçməsi ilə məhdudlaşmır. Bu mənada Orta Dəhliz həm regional, həm də qlobal iqtisadiyyat və bazarlar üçün çox vacib bir fürsətdir. Gələcək dövr üçün 5 praktiki prioritet Orta Dəhlizə bütün dəhliz üzrə idarəetmə, ortaq fəaliyyət göstəriciləri və maneələrin müntəzəm aradan qaldırılması ilə vahid sistem kimi yanaşmaq, gömrük və nəqliyyatın rəqəmsallaşdırılmasını sürətləndirmək, milli platformaların bir-biri ilə uyğunluğunu və kəsintisiz tranzitin normaya çevrilməsini təmin etmək, bir-birindən ayrılmış layihələr əvəzinə, birgə prioritetləşdirilmiş və maliyyələşdirilən layihələr zənciri yaradaraq infrastrukturun planlaşdırılmasını və maliyyələşdirilməsini uyğunlaşdırmaq, sənaye zonaları, logistika klasterləri və KOB-ların bazarlara çıxışı üçün xüsusi tədbirlər vasitəsilə dəhliz ətrafında regional dəyər zəncirləri qurmaq, nəqliyyat infrastrukturu ilə yanaşı, energetika, rəqəmsal şəbəkələr və insanlararası əlaqələri də birləşdirərək əlaqələndirmə konsepsiyasını genişləndirməkdir".

"Orta Dəhliz artıq strateji əhəmiyyət kəsb edir. Bizim ortaq məsuliyyətimiz bu əhəmiyyəti iqtisadi transformasiyanın hərəkətverici qüvvəsinə çevirməkdir. İnfrastrukturu uyğunlaşdırılmış qaydalar, rəqəmsal sistemlər, dayanıqlı maliyyə və regional istehsal şəbəkələri ilə birləşdirsək, dəhliz Şərq və Qərb arasında bir marşrutdan daha artıq bir şeyə çevrilə bilər. O, bütün tərəfdaşlarımızla əməkdaşlığa açıq olan, daha inteqrasiya olunmuş, dözümlü və rifah içində olan Türk Dünyasının iqtisadi sütunu ola bilər", - deyə SAM rəhbəri əlavə edib.

Oxşar xəbərlər

Bakıda Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin açılış mərasimi olub

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN