Azərbaycan Qlobal Cəlbedicilik İndeksinin ("Global Attractiveness Index", GAI 2026) 11-ci buraxılışında 146 dövlət arasında mövqeyini dörd pillə yaxşılaşdıraraq 60-cı yerdə qərarlaşıb və dayanıqlığın gücləndirilməsi dinamikası, həmçinin makroiqtisadi göstəricilər üzrə dünya liderləri sırasına daxil olub.

"Far.Az" xəbər verir ki, bunu "TEHA Group"un ("The European House – Ambrosetti") idarəedici tərəfdaşı və baş direktoru Valerio De Molli (Valerio De Molli) Bakıda keçirilən II Azərbaycan Beynəlxalq İnvestisiya Forumu (AIIF 2026) zamanı deyib.

GAI reytinqi dünya əhalisinin 95 %-ni və qlobal ümumi ÜDM-in 99 %-ni təşkil edən 146 ölkəni qiymətləndirir. İndeksin metodologiyası Avropa Komissiyasının Birgə Tədqiqat Mərkəzinin (JRC) auditindən keçir.

"Azərbaycanın GAI 2026-da əsas göstəriciləri: ümumi cəlbediciliyə (GAI 2026) görə dünyada 60-cı, Dinamiklik İndeksinə görə 15-ci mövqe, dövlət borcunun səviyyəsi - ÜDM-in 20,1 %-i (planetdə ən kiçik səkkizinci göstərici), elmi nəşrlərin həcminin artması - +513 % (artım tempinə görə dünyada dördüncü yer)", - V.De Molli bildirib.

"TEHA Group"un rəhbəri qeyd edib ki, Azərbaycan ən əhəmiyyətli irəliləyişi Dinamiklik İndeksində göstərərək son səkkiz il ərzində dünya reytinqində 145-ci pillədən 15-ci pilləyə yüksəlib. Bu nəticə qeyd olunan dövr ərzində dünya ölkələri arasında mövqelərin yaxşılaşmasının miqyasına görə ikincidir.

"GAI-ın digər subindeksləri üzrə də nəzərəçarpacaq artım qeydə alınıb - mövqelənmə indeksi: dünyada 64-cü yer (8 il ərzində +6 mövqe), dayanıqlıq indeksi - dünyada 62-ci yer (8 il ərzində +30 mövqe), gələcəyə istiqamətlənmə indeksi - dünyada 65-ci yer (7 il ərzində +13 mövqe)", - o vurğulayıb.

Cənubi Qafqaz və Mərkəzi Asiya makroregionunda Azərbaycan ümumi cəlbedicilik səviyyəsinə görə Qazaxıstanı (56-cı yer) və Gürcüstanı (59-cu yer) irəli buraxaraq, lakin Özbəkistanı (63-cü yer), Ermənistanı (68-ci yer), Qırğızıstanı (80-ci yer) və Tacikistanı (96-cı yer) qabaqlayaraq üçüncü pillədə (60-cı yer) qərarlaşıb. Bununla yanaşı, Azərbaycan regionda illik ən əhəmiyyətli yüksəlişi (bir il ərzində +4 mövqe) qeydə alıb.

V.De Mollinin sözlərinə görə, Azərbaycan Cənubi Qafqaz və Mərkəzi Asiya regionunda 7 əsas səmərəlilik indikatoru üzrə lider mövqeyini tutub:

"Elmi nəşrlərin həcminin dinamikası (dünyada və makroregionda I yer), enerji balansı (dünyada IV, makroregionda I yer), birbaşa xarici investisiya axınının dinamikası (dünyada VI, makroregionda I yer), mənfəət üzrə vergi yükünün azalma dinamikası (dünyada VI, makroregionda I yer), dövlət borcunun ÜDM-ə nisbəti (dünyada VIII, makroregionda I yer), amillərin ümumi məhsuldarlığının (TFP) dinamikası (dünyada VIII, makroregionda I yer), əmək qabiliyyətli yaşda olan (20 yaş) əhalinin payının proqnozu (dünyada 29-cu, makroregionda I yer)", - V.De Molli bildirib.

Oxşar xəbərlər

İlham Əliyev Lənkəran Dövlət Peşə Təhsil Mərkəzinin açılışında iştirak edib

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Prezident İlham Əliyev Milli Aviasiya Akademiyasında Beynəlxalq Təlim Mərkəzinin açılışında iştirak edib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2