İranın ali dini lideri Xameneinin tapşırığı ilə onun varisini müəyyən etmək üçün 2 il əvvəl yaradılmış komissiya son günlər fəaliyyətini xeyli gücləndirib.

Far.Az xəbər verir ki, bu barədə "Azad İran" məlumat yayıb.

Komissiyanın işinin sürətləndirilməsi İsrailin İran ərazisinə hücumlara başlaması ilə bağlıdır.

Məlumata görə, Xamenei və ailə üzvləri hazırda yüksəkvəzifəli şəxslərin təhlükəsizliyinə cavabdeh olan İslam İnqilabı Keşikçiləri Korpusunun (SEPAH) Vali-ye Əmr xüsusi bölməsinin gücləndirilmiş mühafizəsi altındadır.

Bildirilir ki, Xameneinin ölümü və ya fəaliyyət qabiliyyətini itirməsi halında İran rəhbərliyi mümkün qədər tez onun varisini elan etməyə çalışacaq. Bu, hakimiyyətin sabitliyini və davamlılığını nümayiş etdirmək üçün lazımdır.

Hazırda pərdəarxası müzakirələrdə iki əsas namizəd göstərilir. Birincisi, uzun müddətdir ki, ən çox ehtimal olunan varis hesab edilən indiki liderin oğlu, 56 yaşlı Müctəba Xameneidir. İkincisi, İslam Respublikasının banisi Ruhullah Xomeyninin nəvəsi Həsən Xomeynidir. Həsən Xomeyni ölkə daxilində siyasi və sosial məhdudiyyətlərin yumşaldılmasını müdafiə edən islahatçı dairələrə yaxındır. Mənşəyinə görə o, həm dini elita arasında, həm də SEPAH komandanlığı arasında nüfuza malikdir.

İsraillə münaqişənin gərginləşməsi və ABŞ ilə gərgin münasibətlər fonunda Xomeyni fiquru xüsusi əhəmiyyət kəsb edib. O, Müctəba Xameneinin daha sərt xəttindən fərqli olaraq, həm daxili, həm də xarici siyasətdə daha mötədil və barışdırıcı kurs təklif edə biləcək potensial lider kimi qiymətləndirilir.

Məlumata görə, hazırkı rejimin əsas fiqurları - keçmiş Prezident Həsən Ruhani, parlamentin keçmiş sədri Əli Laricani və onun qardaşı, məhkəmə sisteminin keçmiş rəhbəri Sadiq Laricani ali lider Əli Xamenei ilə əlaqə saxlamağa çalışsalar da, bu, heç bir nəticə verməyib. Xamenei tamamilə təcrid olunub və yalnız azsaylı yaxın ətrafının ona çıxışı var.

Bildirilir ki, Əli Laricani artıq özünü varis roluna hazırlayır və Xameneinin gedişindən sonra özünü ölkənin "xilaskarı" kimi təqdim etmək istəyir. Keçid dövründə onun mövqelərini gücləndirə biləcək inzibati, siyasi və hərbi təcrübəsi, dini dairələrlə əlaqələri var.

Oxşar xəbərlər

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

Prezident İlham Əliyev XII Qlobal Bakı Forumunun açılış mərasimində çıxış edib

“Dövlət informasiya ehtiyatlarının və sistemlərinin Nümunəvi Əsasnaməsi” təsdiq edilib