Malayziyanın mənzil inşaatı və yerli özünüidarəetmə naziri, BMT-nin Məskunlaşma Proqramı (UN-Habitat) Assambleyasının fəaliyyətdə olan prezidenti Nqa Kor Minq Bakıda "UN-Habitat"ın icraçı direktoru Anaklaudia Rossbax ilə ikitərəfli görüş keçirib.

Bu barədə "Report" Malayziyanın Mənzil İnşaatı və Yerli Özünüidarəetmə Nazirliyinin "Facebook" səhifəsinə istinadən xəbər verir.

Ümumdünya Şəhərsalma Forumunun (WUF13) platformasında baş tutan görüş zamanı əsas diqqət təşkilatın 2026-2029-cu illər üzrə strateji planının həyata keçirilməsində qlobal əməkdaşlığın gücləndirilməsinə yönəldilib.

Qeyd olunub ki, tərəflər üç əsas istiqamət üzrə qarşılıqlı fəaliyyət perspektivlərini müzakirə ediblər. Əsas müzakirə mövzuları şəhər mühitinin rahatlığı, rəqəmsal urbanizasiya və bələdiyyə şuralarının işində könüllü icmalların tətbiqi olub.

"Malayziya şəhərləri daha dayanıqlı, inklüziv və gələcəyə hazır etmək üçün "UN-Habitat" və beynəlxalq tərəfdaşlarla sıx əməkdaşlığa tam sadiq qalır. Bura qlobal qeyri-müəyyənliyə, ekstremal iqlim hadisələrinə və yaşayış dəyəri ilə bağlı böhrana tab gətirə bilmələri üçün şəhərlərin və icmaların gücləndirilməsi daxildir", - Nqa Kor Minq vurğulayıb.

Qeyd edək ki, WUF13 mayın 17-22-də Bakıda keçiriləcək. Forum Azərbaycanın BMT-nin Məskunlaşma Proqramı (UN-Habitat) ilə sıx əməkdaşlığı çərçivəsində keçirilir və dayanıqlı şəhərsalma, "ağıllı şəhərlər" və innovativ şəhər həlləri sahəsində beynəlxalq təcrübə mübadiləsinə yönəlib.

Oxşar xəbərlər

Prezident İlham Əliyev Bakı Olimpiya Stadionunun ərazisində WUF13 ilə bağlı görülən işlərlə tanış olub

Global Media Group BMT-nin Qlobal Sazişi ilə birgə "Dayanıqlı yaşayış mühitinin dili" mövzusunda media sessiyası təşkil edib

FHN WUF13-ə hazırlıq çərçivəsində otellərdə təlimlər keçirib

İlham Əliyevin XIII Qlobal Bakı Forumunun açılış mərasimindəki çıxışının TAM MƏTNİ

Prezident İlham Əliyev BMT-nin Məskunlaşma Proqramının icraçı direktorunu qəbul edib