Son üç həftə ərzində ABŞ Silahlı Qüvvələri İranın blokadasına baxmayaraq, 70-ə yaxın gəminin Hörmüz boğazından təhlükəsiz keçidini təmin edib.

"Report" xəbər verir ki, bu barədə "The New York Times" (NYT) qəzeti mənbələrə istinadən məlumat yayıb.

Məlumata görə, ticarət gəmilərinin bu strateji əhəmiyyətli su yolundan keçməsinə ABŞ Silahlı Qüvvələrinin Mərkəzi Komandanlığı (CENTCOM) köməklik göstərib.

NYT qeyd edib ki, boğazdan keçməzdən əvvəl gəmilərin əksəriyyətinin ekipajı görünmə dərəcəsini azaltmaq üçün izləmə cihazlarını söndürüb. Bir sıra hallarda isə marşrutlar İran sahillərindən uzaq məsafədə qurulub.

Qəzet vurğulayıb ki, Vaşinqton və Tehran arasındakı danışıqlarda irəliləyişin olmaması fonunda regionda vəziyyət gərgin, boğaz vasitəsilə gəmiçilik isə potensial olaraq riskli qalmaqdadır.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.

Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.

ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlandığını elan edib. Regionda dinamik şəkildə dəyişən vəziyyət qlobal enerji böhranına səbəb olub.

Oxşar xəbərlər

Ağsu dolaylarındakı son durum: Sürüşmə riskini azaltmaq üçün tədbirlər görülür

AMEA-nın Rəyasət Heyətinin "gərgin" iclası

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN