ABŞ-də qida mənşəli olduğu ehtimal edilən siklosporiaz infeksiyasının geniş yayıldığı bildirilir. Mütəxəssislər ölkə üzrə təxminən 7 min nəfərin bu xəstəliyə yoluxmuş ola biləcəyini açıqlayıblar.

BAKU.WS xəbər verir ki, ABŞ Xəstəliklərə Nəzarət və Profilaktika Mərkəzinin (CDC) məlumatına görə, infeksiya indiyədək azı 34 ştatda aşkarlanıb. Hazırda 1 645 yoluxma laboratoriya üsulu ilə təsdiqlənib, 5 100-dən çox şübhəli hal isə araşdırılır.

CDC həkimlərə klinik əlamətlər müşahidə olunan xəstələrdə "Cyclospora" parazitinin aşkarlanmasına yönəlmiş testlərin aparılmasını tövsiyə edib.

Məlumata əsasən, may ayından bəri xəstəlik səbəbindən 141 nəfər xəstəxanaya yerləşdirilib. İndiyədək ölüm halı qeydə alınmayıb.

ABŞ Qida və Dərman Administrasiyası (FDA) infeksiyanın mənbəyini müəyyənləşdirmək üçün araşdırmalara başlayıb. Lakin hələlik yoluxmanın konkret hansı qida məhsulu, restoran, market və ya tədarük zənciri ilə əlaqəli olduğu müəyyən edilməyib.

Qeyd edək ki, siklosporiaz Cyclospora adlı mikroskopik parazitin törətdiyi infeksiyadır. Xəstəlik əsasən çirklənmiş su və ya gigiyena qaydalarına əməl olunmadan emal edilmiş, xüsusilə çiy şəkildə istehlak olunan meyvə-tərəvəz məhsulları vasitəsilə yayılır. İnfeksiyanın əsas əlamətləri uzunmüddətli və şiddətli ishal, qarın ağrısı, ürəkbulanma və halsızlıqdır.

Oxşar xəbərlər

1 saylı İxtisaslaşdırılmış Poliklinikanın Laboratoriya şöbəsinin açılışı olub

İlham Əliyev Lənkəran Dövlət Peşə Təhsil Mərkəzinin açılışında iştirak edib

BP-nin dəstəyi ilə Naxçıvanda yeni laboratoriya və emalatxanalar yaradılır

Prezident İlham Əliyev Milli Aviasiya Akademiyasında Beynəlxalq Təlim Mərkəzinin açılışında iştirak edib

Lökbatandakı yanğına helikopterlər indiyədək 200 ton su töküb - YENİLƏNİB-4