Özbəkistan Prezidenti Şavkat Mirziyoyev ölkənin ali məktəb tələbələrinin yarıdan çoxunu bu gün qızların və qadınların təşkil etdiyini bildirərək, bunu Üçüncü İntibah dövrünün əlaməti adlandırıb.

"Report"un Daşkəndə ezam olunmuş müxbirinin verdiyi məlumata görə, bunu prezident Özbəkistanın müstəqilliyinin 35 illiyinə həsr olunmuş təntənəli tədbirdə bildirib.

Mirziyoyev təhsilin inkişafının və müasir biliklərə və gələcəyin peşələrinə yiyələnmiş yeni nəsil mütəxəssislərin hazırlanmasının vacibliyini vurğulayıb.

O bildirib ki, son 10 ildə məktəbəqədər təhsilin əhatə dairəsi 2016-cı ildəki 27 %-dən cari ildə 78 %-ə qədər genişlənib, məktəblərdə isə əlavə olaraq 1,5 milyon şagird yeri yaradılıb.

Özbəkistan Prezidenti, həmçinin ali təhsilin daha da əlçatan olduğunu qeyd edib. Onun sözlərinə görə, ali məktəb tələbələrinin sayı 2016-cı ildəki 250 mindən 1,6 milyona qədər artıb.

"Gənclərin fəal şəkildə bilik əldə etməyə can atması sevindirici haldır. Valideynlər üçün övladlarının ali təhsil alması artıq uzaq bir xəyal deyil, reallıqdır", - Mirziyoyev bildirib.

O xüsusi olaraq qeyd edib ki, bu gün ali məktəb tələbələrinin yarıdan çoxu qızlar və qadınlardır. "Bu, bir növ Üçüncü İntibah dövrünün əlamətidir", - Prezident vurğulayıb.

"Bununla yanaşı, biz informasiya texnologiyaları, süni intellekt və kreativ iqtisadiyyat kimi istiqamətlərin inkişafına yeni təkan verən genişmiqyaslı işlərə başlamışıq. Beləliklə, biz 10 milyon gənci rəqəmsal sənaye sahəsinə və gələcəyin peşələrinə cəlb edəcəyik", - o əlavə edib.

Özbəkistan tarixində rəsmi olaraq iki böyük mədəni və elmi yüksəliş dövrü fərqləndirilir: Birinci İntibah dövrü (IX–XII əsrlər) və İkinci İntibah dövrü (XIV - XVI əsrin əvvəlləri). Özbəkistanda Üçüncü İntibah dövrü Prezident Şavkat Mirziyoyev tərəfindən irəli sürülən, ölkənin genişmiqyaslı mənəvi, elmi, iqtisadi və mədəni yüksəlişini hədəfləyən dövlət strateji konsepsiyasıdır.

Oxşar xəbərlər

Bakıda Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin açılış mərasimi olub

Şəhid analarının iştirakı ilə Vətən müharibəsində Zəfərin 5 illiyinə həsr olunmuş tədbir keçirilib

Vətən müharibəsində Qələbənin beşinci ildönümünə həsr olunmuş Hərbi parad keçirilib

Milli Məclisə seçkilərdə lider namizədlərin adları açıqlanıb - YENİLƏNİB

VII çağırış Milli Məclisin deputatları - SİYAHI