Avropa xarici siyasət məsələlərinin müzakirəsi zamanı Avropa Parlamentinin deputatı Avropa və Asiya arasında Rusiyadan yan keçən nəqliyyat marşrutu olan Orta Dəhlizin inkişafında Azərbaycan və Gürcüstanın strateji rolu mövzusunu qaldırıb.

"Far.Az"un Avropa bürosunun məlumatına görə, bu barədə Rumıniya nümayəndəsi Kristian Terheş Yaxın Şərqdəki böhranın aradan qaldırılması məsələsində Avropa İttifaqının (Aİ) strategiyasının müzakirəsi zamanı bildirib.

Terheş vurğulayıb ki, coğrafiya Cənubi Qafqazı Avropa logistikasının əsas elementinə çevirir və Aİ-nin region dövlətlərinə münasibətdə konkret addımları məsələsini qabardıb.

Onun sözlərinə görə, Yaxın Şərqdə vəziyyətin gərginləşməsi artıq Hörmüz boğazı da daxil olmaqla, əsas tranzit istiqamətlərinə təsir göstərir və Avropa ölkələrini yenidən alternativ tədarük marşrutlarına diqqət yetirməyə məcbur edir.

Bununla yanaşı, deputat marşrutun praktiki reallaşdırılması məsələsini qaldıraraq Aİ-nin Azərbaycan və Gürcüstanla münasibətlərini xüsusi qeyd edib.

"Aİ Gürcüstanla qarşılıqlı əlaqə qurmursa, Azərbaycan isə bu yaxınlarda Avropa Parlamenti ilə gələcək əməkdaşlıqdan imtina edibsə, biz Mərkəzi Asiyadan Avropaya yükləri necə çatdıracağıq?" - o soruşub.

Buna cavab olaraq Kaya Kallas Gürcüstan və Azərbaycan ətrafındakı vəziyyəti ayrıca şərh etməyib və diqqətini Mərkəzi Asiya vasitəsilə nəqliyyat istiqamətlərinin şaxələndirilməsi kimi daha geniş mövzuya cəmləyib.

"Mən sizinlə tam razıyam ki, ticarət marşrutlarının şaxələndirilməsi üçün Mərkəzi Asiya ilə işləməliyik", - o bildirib.

Avropa diplomatiyası rəhbərinin sözlərinə görə, son illərin böhranları tədarükdə bir istiqamətdən asılı olmamağın vacibliyini göstərib: "Düşünürəm ki, hamı bundan dərs çıxarıb".

O həmçinin bildirib ki, Aİ Mərkəzi Asiya üzrə daha bir nazirlər görüşü hazırlayır. "Ötən il bizim belə bir görüşümüz olub, xüsusən də nəqliyyat dəhlizləri və böhran halında istifadə edə biləcəyimiz müxtəlif yanaşmalar və ya ticarət marşrutlarına sahib olmaq üçün birlikdə nələr edə biləcəyimiz barədə", - Kallas məlumat verib.

Oxşar xəbərlər

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib