"Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı"nın həyata keçirilməsi ilə bağlı Tədbirlər Planında nəzərdə tutulmuş Bakı-Xırdalan-Sumqayıt və Bakı–Pirşağı–Sumqayıt dəmir yolu xətlərinin təkmilləşdirilməsi, Bakıxanov–Binə–Qala, Zabrat–Maştağa–Bağlar, Yeni Suraxanı–Hövsan və Güzdək–Qaradağ dəmir yolu xətlərinin bərpası üzrə layihələrin icrasını "Azərbaycan Dəmir Yolları" QSC həyata keçirir".

Bu barədə Far.Az-in sorğusuna cavab olaraq "Azərbaycan Dəmir Yolları" QSC-dən (ADY) bildirilib.

Qurumdan qeyd edilib ki, proqram çərçivəsində dəmir yolu xətlərinin bərpası, eləcə də bu xətlər boyunca mövcud stansiyaların bərpası və yeni stansiyaların inşası istiqamətində layihələndirmə işləri aparılır:

"Bu işlər bitirildikdən sonra stansiya və dayanacaqların sayı 40-a çatdırılacaq. Qeyd edək ki, bu ilin mayında Dərnəgül dayanacağının istifadəyə verilməsi ilə Abşeron dairəvi dəmir yolu marşrutu üzrə stansiya və dayanacaqların sayı 15-ə çatıb.

Hazırda Dövlət Proqramının icrası çərçivəsində dəmiryol xətləri üzrə layihələndirmə işləri davam etdirilir. Eyni zamanda, 2030-cu ilədək 20 ədəd yeni sərnişin qatarının alınması nəzərdə tutulub.

Paralel olaraq ölkəmizin digər bölgələrində də dəmiryol layihələrinin icrası həyata keçirilir. Hazırda Ağdam-Xankəndi dəmiryol xətti üzrə 3 ədəd stansiyanın (Əsgəran; Xocalı; Xankəndi Dəmir Yolu və Avtovağzal Kompleksi) inşası nəzərdə tutulur. Dəmir yolu xəttinin layihələndirilməsi 90% yerinə yetirilib, xəttin tikinti-quraşdırma işləri üzrə fiziki tərəqqi isə 44% təşkil edir.

Horadiz-Ağbənd layihəsi çərçivəsində isə 8 stansiyanın (Yuxarı Mərcanlı, Şükürbəyli, Soltanlı, Qumlaq, Həkəri, Mincivan, Bartaz, Ağbənd) tikintisi nəzərdə tutulur. Dəmir yolu xəttinin layihələndirilməsi 85% yerinə yetirilib, layihə üzrə fiziki tərəqqi isə 73% təşkil edir.

Naxçıvanda dəmir yolu infrastrukturunun yenidən qurulması ilə bağlı işlər intensiv şəkildə davam etdirilir, regional kommunikasiyaların bərpası ilə mühüm addımlar atılır".

Orxan Hüseyn

Oxşar xəbərlər

Pirşağı–Novxanı–Xırdalan–M4 avtomobil yolunun tikintisi layihəsinin 51 %-i icra edilib

Ağalı və Məmmədbəyli kəndlərində Novruz festivalı və sərgi-satış yarmarkası keçirilib

İlham Əliyev Xocavənd şəhər və Xocavənd kənd sakinləri ilə görüşüb

Heydər Əliyev Fondu Lənkəran uşaq evini əsaslı yenidənqurmadan sonra istifadəyə verib

Xocalı şəhərində "Qarabağ Tekstil Evi" MMC istifadəyə verilib