Yaponiyanın Osaka Universitetinin rəhbərlik etdiyi beynəlxalq tədqiqat qrupu kosmosda həyat izlərini aşkarlamaq üçün yeni elektrik əsaslı üsul hazırlayıb. "Nature Communications" jurnalında dərc olunan tədqiqatda təqdim edilən texnologiya mövcud analiz üsullarından daha kiçik və praktik alternativ hesab olunur.

Far.Az xəbər verir ki, yeni metod zülalların əsas tikinti blokları olan amin turşularına əsaslanır. Bu molekullar L və D adlanan iki güzgü formasında mövcuddur. Onların nümunədəki nisbəti maddənin bioloji, yoxsa qeyri-bioloji proseslər nəticəsində yaranması barədə məlumat verə bilər.

Tədqiqatçılar iki qızıl nanotel arasındakı son dərəcə kiçik boşluqdan istifadə edərək amin turşularının formalarını müəyyənləşdirən mikroçip hazırlayıblar. Nümunə çipə yerləşdirildikdə elektrik cərəyanında yaranan dəyişikliklər qeydə alınır. Süni intellekt və maşın öyrənməsi alqoritmləri bu siqnalları təhlil edərək molekulların hansı formaya aid olduğunu müəyyənləşdirir.

Osaka Universitetinin biomühəndisi Takahito Oşiro bildirib ki, yeni üsul amin turşularının L və D formalarını 80 faizdən yüksək dəqiqliklə ayırmağa imkan verib. Tədqiqatçılar bunu ayrı-ayrı molekullar səviyyəsində amin turşularının formalarının fərqləndirilməsi istiqamətində mühüm nəticə kimi qiymətləndirirlər.

Yeni texnologiya Avstraliyadakı Marçison meteoritindən götürülmüş nümunələrdə və Çilinin Atakama səhrasından əldə edilən torpaq materiallarında da sınaqdan keçirilib. Osaka Universitetinin nanotexnologiya mütəxəssisi Masateru Taniquçinin sözlərinə görə, nəticələr ənənəvi analiz üsulları ilə müqayisə edilə bilən göstəricilər nümayiş etdirib.

Hazırda sistemin kosmik aparatlarda və pilotsuz tədqiqat vasitələrində istifadə oluna biləcək tam funksional qurğuya çevrilməsi üzərində iş aparılır. Gələcəkdə bu texnologiyanın uzaq planetlərdə və onların peyklərində həyat əlamətlərinin axtarışında tətbiqi nəzərdə tutulur.

Qeyd edək ki, amin turşularının formalarının müəyyənləşdirilməsi mümkün bioloji mənşənin araşdırılmasına kömək edə bilər. Lakin bu üsulun nəticələri özlüyündə yadplanetli həyatın mövcudluğunu sübut etmir.

Oxşar xəbərlər

Prezident İlham Əliyev Sumqayıt Sənaye Parkında güzgü vərəqələrin istehsalı zavodunun açılışında iştirak edib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Şahin Bağırov: "Azərbaycanın gömrük sistemi elə bir səviyyəyə çatıb ki, təcrübəsini digər dövlətlərə təqdim edir" – MÜSAHİBƏ

Şahin Bağırov: "Azərbaycanın gömrük sistemi elə bir səviyyəyə çatıb ki, təcrübəsini digər dövlətlərə təqdim edir"